مون سون : کراچی، لاہور سمیت ملک کے مختلف حصوں میں بارش

تفصیلات کے مطابق  گرمی سے پریشان عوام  نے سکھ کا سانس لیا، ملک کے مختلف علاقوں میں بارش، ٹھنڈی ہواؤں اور بادل برسنے سے حبس کی شدت میں کمی آگئی۔لاہور ،  اسلام آباد، راولپنڈی اور گردونواح میں موسلادھاربارش ہوئی۔محکمہ موسمیات نے صوبائی دارالحکومت لاہور  میں پیر سے جمعرات تک بارشوں کی پیشگوئی کردی ۔

پنجاب کے مختلف  شہروں   گوجرانوالہ،  میانوالی ، ظفر وال ، مریدکے، ڈسکہ، پنڈ دادن خان، کالا باغ میں بھی ابر رحمت جم کر  برسا جبکہ  سیالکوٹ میں تیز بارش سے سڑکوں پر پانی جمع ہوگیا۔ ایبٹ آباد، گلیات اور مانسہرہ میں بادلوں نے خوب رنگ جمایا۔ کشمیر اور گلگت بلتستان کے متعدد مقامات پر بھی بادل خوب برسے۔ تیز بارش کے بعد نشیبی علاقے زیر آب آگئے۔

سندھ میں بھی شدید گرمی کے بعد بادلوں نے دستک دے دی۔ کراچی میں بارش سے موسم سہانا ہوگیا۔ کراچی میں صدر، ملیر، لانڈھی، اسٹیل ٹاؤن، گلشن اقبال، اولڈ سٹی ایریا، صفورا، صدر اور ضلع وسطی کے کئی علاقوں میں کہیں تیز اور کہیں ہلکی بارش ہوئی۔بارش کا آغاز ہوتے ہی کچھ علاقوں میں بجلی کی فراہمی معطل ہوگئی۔ سڑکیں گیلی ہونے کی وجہ سے ٹریفک کی روانی متاثر ہے۔

محکمہ موسمیات کا کہنا ہے کراچی میں ہلکی اور تیز بارش کا سلسلہ وقفے وقفے سے 2 گھنٹے جاری رہ سکتا ہے۔ سندھ کے بیشتر بالائی اور وسطی اضلاع میں موسم شدید گرم رہے گا۔ میر پورخاص، حیدر آباد، سکھر، بینظیرآباد اور سانگھڑ میں مطلع جزوی ابر آلود رہے گا۔