یوروکپ : اٹلی فٹ بال کا نیا چیمپئن بن گیا

غیرملکی خبررساں ادارے کے مطابق اٹلی اور انگلینڈ کی ٹیم کے مابین ویمبلے اسٹیڈیم میں    مقابلہ ہوا اور پنالٹی شوٹس پر میچ کا فیصلہ ہوا ۔ اٹلی نے انگلینڈ کو پینلٹی شوٹ پر 2-3 سے شکست دے  کر دوسری مرتبہ یورپین چیمپئن شپ کا ٹائٹل اپنے نام کرلیا۔کھیل کے آغاز کے دوسرے منٹ میں ہی انگلینڈ نے گول کرکے نفسیاتی برتری حاصل کی ، لیکن  اٹلی کی جانب سے دوسرے ہاف کے 67 ویں منٹ میں بنوکی نے گول کرکے برابر کردیا۔

مقررہ وقت میں ایک ایک گول سے میچ برابر ہونے کے سبب میچ کو فیصلہ کن بنانے کے لیے 30 منٹ کا اضافی وقت دیا گیا۔ مگر اضافی وقت میں بھی کوئی ٹیم گول نہ کرسکی جس کے بعد یورو کپ چیمپئن شپ کا فیصلہ پنالٹی ککس پر کیا گیا جس میں اٹلی نے دو کے مقابلے میں تین گول کرکے جیت اپنے نام کرلی ۔

اگرچہ انگلینڈ کی ٹیم پرامید تھی کہ 55 سالہ طویل انتظار ختم کرتے ہوئے وہ ٹرافی حاصل کرنے میں کامیاب ہو جائے گا لیکن اٹلی نے یورو 2020 کا اعزاز اپنے نام کرلیا ۔1966 کا ورلڈ کپ جیتنے کے بعد انگلینڈ کو پہلی مرتبہ بڑا ٹورنامنٹ جیتنے کا موقع ملا تھا۔

اٹلی اور انگلینڈ کا فائنل میچ دیکھنے کے لیے برطانیہ کے وزیراعظم بورس جانسن، شہزادہ ولیم، کیٹ مڈلٹن اور ننھے شہزادہ جارج بھی موجود تھے جبکہ دیگر اہم شخصیات میں ہالی ووڈ اسٹار ٹام کروز اور فٹبالر ڈیوڈ بیکھم بھی اسٹیڈیم میں آئے تھے۔

 فائنل سے قبل لندن کے شہریوں کا جوش و خروش عروج پر پہنچ چکا تھا، فائنل کے آغاز سے قبل شام سے ہی لندن کی سڑکیں سنسان ہوگئی تھیں۔ جیت کا جشن منانے کے لیے اٹلی کے عوام سڑکوں پر نکل آئے۔

خیال رہےکہ عالمی سطح پر کورونا  کے  پھیلاؤ کے پیش نظر رواں سال شیڈول سال کے اہم فٹبال مقابلوں یورو کپ اور کوپا امریکا کو ایک سال کے لیے مؤخر کردیا گیا تھا۔