گلگت بلتستان کا 1 کھرب 48 ارب کا بجٹ پیش، سرکاری ملازمین کی تنخواہوں میں 10 فیصد اضافہ

گلگت بلتستان حکومت نے مالی سال 2025-26 کے لیے 1 کھرب 48 ارب 63 کروڑ 20 لاکھ روپے کا بجٹ پیش کیا، جس میں 6 ارب روپے کا خسارہ بھی شامل ہے۔

وزیر خزانہ گلگت بلتستان انجینئر محمد اسماعیل نے یہ بجٹ اسمبلی میں پیش کیا، جس میں سرکاری ملازمین کی تنخواہوں میں 10 فیصد اضافے کا اعلان بھی کیا گیا ہے۔

بجٹ میں غیر ترقیاتی اخراجات کے لیے 88 ارب 19 کروڑ 20 لاکھ روپے مختص کیے گئے ہیں، جبکہ ترقیاتی منصوبوں کے لیے 37 ارب روپے کی رقم رکھی گئی ہے۔ وفاقی پی ایس ڈی پی کے تحت منصوبوں کے لیے 11 ارب روپے اور وزیرِاعظم پروگرام کے لیے 4 ارب روپے مختص کیے گئے ہیں۔ اس کے علاوہ، گندم سبسڈی کے لیے 20 ارب روپے کی خطیر رقم تجویز کی گئی ہے۔

حکومت نے نان ٹیکس ریونیو کا ہدف 7 ارب 89 کروڑ 20 لاکھ روپے مقرر کیا ہے۔

وزیر خزانہ نے بجٹ تقریر میں کہا کہ تعلیم کے شعبے کے لیے 1 ارب 47 کروڑ روپے، صحت کے شعبے کے لیے 1 ارب 25 کروڑ روپے مختص کیے گئے ہیں، جس میں ہیلتھ انڈومنٹ فنڈ کے لیے 62 کروڑ روپے بھی شامل ہیں۔ مزید برآں، زراعت، لائیو اسٹاک اور ماہی پروری کے لیے 35 کروڑ روپے، سیاحت کے شعبے کے لیے 9 کروڑ روپے، اور انفارمیشن ٹیکنالوجی کے لیے 10 کروڑ روپے مختص کیے گئے ہیں۔