پنجاب حکومت کا عوام پر ایک اور مہنگائی بم، اسپتالوں میں صحت کارڈ کے ذریعے علاج کی سہولت ختم

لاہور: پنجاب حکومت نے عوام پر ایک اور مہنگائی کا بم گرا دیا، سرکاری اسپتالوں میں مفت علاج کے لیے استعمال ہونے والے 'صحت کارڈ' کی سہولت بند کرنے کا فیصلہ کیا گیا ہے۔

اس حوالے سے پنجاب ہیلتھ انیشیٹو مینجمنٹ کمپنی کی جانب سے تمام سرکاری ہسپتالوں کے سربراہوں کو باضابطہ مراسلہ جاری کر دیا گیا ہے۔
جاری مراسلے میں کہا گیا ہے کہ 30 جون 2025 کے بعد ہیلتھ کارڈ کے ذریعے علاج کی سہولت دستیاب نہیں ہوگی۔

مراسلے کے مطابق تمام ہسپتالوں کو ہدایت کی گئی ہے کہ وہ ہیلتھ کارڈ کے تحت ہونے والے علاج کے تمام واجبات 30 جون سے پہلے ادا کر دیں کیونکہ اس تاریخ کے بعد یہ سہولت ختم ہو جائے گی۔

مزید کہا گیا ہے کہ وزیر اعلیٰ پنجاب 30 جون کے بعد مفت علاج کی نئی پالیسی متعارف کرائیں گے۔

واضح رہے کہ ہیلتھ کارڈ کا پائلٹ پراجیکٹ 2014 میں اس وقت کے وزیراعظم نواز شریف نے شروع کیا تھا جب کہ دسمبر 2021 میں پاکستان تحریک انصاف (پی ٹی آئی) کی حکومت نے پنجاب بھر میں اس منصوبے کا باقاعدہ افتتاح کیا تھا۔

اس پروگرام کے تحت لاکھوں غریبوں کا سرکاری ہسپتالوں میں مہنگے علاج کی بجائے باوقار طریقے سے مفت علاج ہوا،جو کہ منصوبے کی بندش کی وجہ سے مزید فری علاج نہیں ہو سکے گا۔