عطا تارڑ کی خیبرپختونخوا حکومت پر شدید تنقید، ’یہ سیاحوں کی نہیں، نظام کی موت ہے

اسلام آباد: وفاقی وزیر اطلاعات عطااللہ تارڑ نے خیبرپختونخوا کے علاقے دریائے سوات میں پیش آنے والے افسوسناک واقعے پر صوبائی حکومت کو شدید تنقید کا نشانہ بناتے ہوئے کہا ہے کہ یہ سانحہ سیاحوں کی نہیں، بلکہ پی ٹی آئی کے 12 سالہ نظام کی موت ہے۔

اسلام آباد میں پریس کانفرنس کرتے ہوئے وزیر اطلاعات نے کہا کہ دریائے سوات میں شہریوں کے بہہ جانے اور ریسکیو میں تاخیر نے صوبائی حکومت کی مکمل ناکامی کو بے نقاب کر دیا ہے۔ اُن کا کہنا تھا کہ:

"یہ المیہ پوری قوم کے لیے دکھ اور رنج کا باعث بنا۔ وزیراعظم نے بھی اس واقعے پر گہرے افسوس کا اظہار کیا ہے۔ مگر سوال یہ ہے کہ 12 سالہ اقتدار میں ریسکیو کا نظام کیوں نہ بن سکا؟"

’معطل تو وزیراعلیٰ کو ہونا چاہیے تھا‘
عطا تارڑ نے خیبرپختونخوا حکومت کی جانب سے ڈپٹی کمشنر کو معطل کرنے کے فیصلے پر ردعمل دیتے ہوئے کہا:

"اصل ذمہ دار وزیراعلیٰ ہے، جس نے انتہائی غیر سنجیدگی سے کہا کہ خیمے دینا میرا کام نہیں۔"

انہوں نے طنزاً پوچھا کہ "کیا علی امین گنڈاپور کو عوام نے اس لیے ووٹ دیا تھا کہ وہ ’ورک فرام اڈیالہ‘ کریں؟ روزانہ اڈیالہ جیل سے احکامات لینا عوامی خدمت ہے؟"

وزیر اطلاعات کا کہنا تھا کہ "چند سو فٹ کے فاصلے پر پھنسے ہوئے افراد کو گھنٹوں تک ریسکیو نہ کیا جا سکا۔ جدید دور میں جہاں ٹیکنالوجی ہر جگہ دستیاب ہے، وہاں صوبہ خیبرپختونخوا میں ریسکیو سسٹم نہ ہونا مجرمانہ غفلت ہے۔"

انہوں نے الزام لگایا کہ "ہیلی کاپٹر اگر بانی پی ٹی آئی کے غیر قانونی استعمال کے لیے دستیاب ہو سکتا ہے تو عوام کی جان بچانے کے لیے کیوں نہیں؟ خواتین اور بچے مدد کی دہائیاں دیتے رہے، لیکن کوئی نہ آیا۔"