پاکستان اسٹاک مارکیٹ میں اتار چڑھاؤ، KSE-100 انڈیکس 130,686 پر بند

پاکستان اسٹاک ایکسچینج (پی ایس ایکس) میں جمعرات کے روز ملا جلا رجحان دیکھنے میں آیا۔ کاروباری دن کے آغاز پر کے ایس ای 100 انڈیکس ایک موقع پر 1,31,000 پوائنٹس کی سطح عبور کر گیا، تاہم اختتام پر مارکیٹ معمولی کمی کے بعد 130,686 پوائنٹس پر بند ہوئی۔

پی ایس ایکس کی ویب سائٹ کے مطابق مالی سال 2024-25 کے پہلے کاروباری ہفتے کے چوتھے روز، جمعرات کو اسٹاک مارکیٹ میں آغاز سے کچھ دیر بعد تیزی دیکھی گئی، اور صبح 9 بج کر 48 منٹ پر انڈیکس میں 807 پوائنٹس (0.62 فیصد) کا اضافہ ہوا، جس سے انڈیکس 131,151 پوائنٹس تک پہنچ گیا۔

تاہم دن کے دوران تیزی کا رجحان برقرار نہ رہ سکا اور مارکیٹ میں کچھ مندی دیکھنے میں آئی، لیکن کاروبار کے اختتام پر انڈیکس مثبت زون میں بند ہوا۔

مجموعی طور پر 467 کمپنیوں کے شیئرز کی خرید و فروخت ہوئی، جن میں سے 215 کمپنیوں کے حصص کی قیمتوں میں اضافہ، 236 کمپنیوں کے شیئرز میں کمی، جب کہ 16 کمپنیوں کے نرخ مستحکم رہے۔

یاد رہے کہ بدھ کے روز، مالی سال کے دوسرے دن، اسٹاک مارکیٹ نے زبردست تیزی کا مظاہرہ کرتے ہوئے 2,144 پوائنٹس کے اضافے کے ساتھ 130,344 پوائنٹس کی نئی تاریخی بلند ترین سطح حاصل کی تھی۔

اس سے ایک روز قبل منگل کو، نئے مالی سال کے پہلے کاروباری دن، مارکیٹ میں 2,572 پوائنٹس (2.05 فیصد) کا نمایاں اضافہ ہوا تھا، جس کے بعد انڈیکس 128,199 پوائنٹس پر بند ہوا تھا۔