پانی کروڑوں پاکستانیوں کی لائف لائن ہےجس کو روکنا اقدام جنگ کے مترادف ہوگا، شہباز شریف

باکو: وزیراعظم شہباز شریف نے کہا ہے کہ پانی کروڑوں پاکستانیوں کی لائف لائن ہےجس کو روکنے کا بھارتی اقدام جنگ کے مترادف ہوگا۔

آذر بائیجان میں اقتصادی تعاون تنظیم کے 17 ویں سربراہی اجلاس سے خطاب کرتے ہوئے وزیراعظم نے کہا کہ پانی کروڑوں پاکستانیوں کی لائف لائن ہے، پاکستان کا پانی روکنے کا بھارتی اقدام جنگ کے مترادف ہوگا۔

اجلاس سے خطاب کرتے ہوئے وزیر اعظم نے کہا کہ سندھ طاس معاہدے کی معطلی کےبھارتی اقدامات کا مقصد علاقائی امن کو نقصان پہنچانا تھا۔

حالیہ پاک بھارت کشیدگی پر گفتگو کرتے ہوئے وزیر اعظم نے کہا کہ بھارت کی جانب سے مسلط کی جانے والی جارحیت کا پاک فوج نے مثالی جرات، پیشہ ورانہ مہارت کے ساتھ جواب دیا۔ 

انہوں نے کہا کہ غزہ کو تباہی کا سامنا ہے، ایسا لگتا ہے جیسے غزہ میں انسانیت کا وجود ہی نہیں، قحط سالی کی صورتحال، فاقہ کشی اور امدادی کارکنوں پر اسرائیلی حملےجاری ہیں، پاکستان دنیا میں کہیں بھی بے گناہ لوگوں پرظلم کرنے والوں کے خلاف کھڑا ہے۔

اجلاس میں وزیراعظم شہباز شریف نے ماحولیاتی تبدیلیوں سے نمٹنے کیلئے کاربن اخراج میں کمی، کاربن مارکیٹ پلیٹ فارم اور مزاحمتی نظام کی تجویز پیش کرتے ہوئے کہا کہ پائیدار نمو کیلئے موسمیاتی فنانسنگ کو فعال کرنا بہت اہم ہے، توانائی کوریڈورز اور ایکو ٹورازم کیلیے اقدامات تیز کرنا ہونگے۔

 شہباز شریف کا کہنا تھا کہ ماحولیاتی چیلنجز نےلاکھوں لوگوں کے روزگار کوخطرے میں ڈال دیا ہے، پاکستان موسمیاتی تبدیلی سے متاثرہ 10 ملکوں میں شامل ہے، پگھلتےگلیشیئرز، شدید گرمی، سیلاب اوردیگر چیلنجز کا سامنا ہے تاہم  پاکستان نے موسمیاتی تبدیلیوں سے نمٹنے کے لیے پالیسی وضع کی ہے۔ 

شہباز شریف نے کہا کہ 2022 میں پاکستان نےتباہ کن سیلاب کا سامنا کیا جس میں 3 کروڑ 30 لاکھ سے زیادہ لوگ متاثرہوئے اور املاک کو شدید نقصان پہنچا۔

شہبازشریف نے مزیدکہا کہ ای سی او ٹرانسپورٹ کوریڈورز کا آغازخوش آئند ہے، ای سی او خطے کو تاریخی ہم آہنگی پر استوار کرتے ہوئے بہتر مستقبل کی تشکیل کرنی چاہیے ، آئیے عہد کریں کہ اپنی یکجہتی اور تعاون کو بڑھائیں گے۔