نواز شریف کی عمران خان سے ملاقات کی خبریں قیاس آرائیاں ہیں، : اسحاق ڈار

نائب وزیراعظم اور وزیر خارجہ اسحاق ڈار نے سابق وزیراعظم نواز شریف کی اڈیالہ جیل میں پاکستان تحریک انصاف کے بانی عمران خان سے ممکنہ ملاقات کی خبروں کو محض قیاس آرائیاں قرار دیا ہے۔

لاہور میں داتا دربار پر میڈیا سے گفتگو کے دوران ایک صحافی کے سوال پر اسحاق ڈار کا کہنا تھا،
"یہ ملاقات کسی کی خواہش ہو سکتی ہے، لیکن ہمیں کسی کے پاس جانے کی ضرورت نہیں۔ ایسی خبریں خود ساختہ اور بے بنیاد ہیں، قانون اپنا راستہ خود بنائے گا۔"

انہوں نے زور دیا کہ ایسی افواہیں مخصوص حلقوں کی جانب سے پھیلائی جاتی ہیں جن کا حقیقت سے کوئی تعلق نہیں۔

پیپلز پارٹی سے متعلق سوال پر اسحاق ڈار نے کہا کہ اتحادی جماعت نے کسی قسم کی وزارتوں کا مطالبہ نہیں کیا۔
"پیپلز پارٹی ہمارے ساتھ اتحادی ہے اور ہم نے مشکل وقت میں ایک دوسرے کا ساتھ دیا ہے۔ اب جب کہ حکومت کو سادہ اکثریت حاصل ہو چکی ہے، ہم انہیں چھوڑنے والے نہیں۔"

وزیر خارجہ نے واضح کیا کہ حکومت تمام سیاسی جماعتوں کے ساتھ مل کر کام کرنے کے لیے تیار ہے، چاہے وہ حکومت کا حصہ ہوں یا اپوزیشن میں۔

انہوں نے کہا کہ جب پاکستان پر حملہ ہوا تو تمام سیاسی جماعتیں ایک صف پر آ گئیں، اور دنیا نے ایک متحد قوم کی آواز دیکھی۔
"یہ ایک مثالی تجربہ تھا، تاہم اس کا مطلب ہرگز یہ نہیں کہ آئین و قانون کو پس پشت ڈال دیا جائے۔"

کرپشن سے متعلق بات کرتے ہوئے اسحاق ڈار نے کہا کہ قانون کے مطابق جہاں کرپشن ہوئی ہے، اسے بے نقاب کیا جائے گا اور قانون کو حرکت میں لایا جائے گا۔