ملک کے مختلف شہروں میں آج رات بارش کا امکان ،  محکمہ موسمیات

محکمہ موسمیات کے مطابق آج رات ملک کے بیشتر علاقوں میں موسم گرم اور حبس زدہ رہنے کا امکان ہے، تاہم کشمیر، شمال مشرقی پنجاب، خطۂ پوٹھوہار، خیبر پختونخوا، جنوب مشرقی سندھ اور شمال مشرقی و جنوبی بلوچستان کے بعض مقامات پر تیز ہواؤں اور گرج چمک کے ساتھ بارش متوقع ہے۔

رپورٹ کے مطابق کشمیر، شمال مشرقی پنجاب، خطہ پوٹھوہار اور بالائی خیبر پختونخوا میں چند مقامات پر تیز یا موسلادھار بارش کا بھی امکان ظاہر کیا گیا ہے۔

اتوار کی موسمی صورتحال کے حوالے سے بتایا گیا ہے کہ اسلام آباد اور گردونواح میں موسم گرم اور شدید حبس زدہ رہے گا، جب کہ مطلع جزوی طور پر ابر آلود رہنے کے ساتھ گرج چمک اور تیز ہواؤں کے ساتھ بارش اور بعض مقامات پر موسلادھار بارش بھی متوقع ہے۔

خیبر پختونخوا کے بیشتر اضلاع میں بھی گرمی اور حبس کے ساتھ جزوی طور پر مطلع ابر آلود رہے گا۔ تاہم دیر، چترال، سوات، کوہستان، مالاکنڈ، شانگلہ، بٹگرام، بونیر، کوہاٹ، بنوں، ڈیرہ اسماعیل خان، باجوڑ، مہمند، خیبر، وزیرستان، اورکزئی، مانسہرہ، ایبٹ آباد، ہری پور، پشاور، مردان، ہنگو اور کرم کے علاقوں میں گرج چمک، تیز ہواؤں کے ساتھ بارش اور بعض مقامات پر تیز یا موسلادھار بارش کا امکان موجود ہے۔