واٹس ایپ کا نیا فیچر: اب گروپس کو اسٹیٹس میں بھی مینشن کیا جا سکے گا

انسٹنٹ میسیجنگ ایپ واٹس ایپ ایک نئے اور دلچسپ فیچر کی آزمائش کر رہی ہے، جس کا مقصد صارفین کے اسٹیٹس (یا اسٹوریز) کو زیادہ وسیع سطح پر قابلِ رسائی بنانا ہے۔

واٹس ایپ کی اپ ڈیٹس پر نظر رکھنے والی ویب سائٹ کے مطابق، کمپنی ایک ایسے فیچر کی محدود آزمائش شروع کر چکی ہے، جس کے تحت صارفین اپنے واٹس ایپ اسٹیٹس میں گروپس کو بھی مینشن کر سکیں گے۔

اس وقت صارفین صرف مخصوص افراد یا محفوظ شدہ نمبرز کو ہی اسٹیٹس میں مینشن کر سکتے ہیں، لیکن گروپس کو ٹیگ کرنے کی سہولت دستیاب نہیں۔ تاہم، نیا فیچر متعارف ہونے کے بعد صارف کسی بھی گروپ کو اسٹیٹس میں مینشن کرے گا، جس کے نتیجے میں وہ اسٹیٹس متعلقہ گروپ کے تمام اراکین کو نوٹیفکیشن کی صورت میں دکھائی دے گا۔

دلچسپ بات یہ ہے کہ فیچر کے تحت گروپ میں شامل وہ افراد بھی نوٹیفکیشن حاصل کر سکیں گے جنہیں صارف نے بلاک کر رکھا ہو، کیوں کہ وہ گروپ کا حصہ ہیں، اس لیے انہیں اسٹیٹس تک رسائی حاصل رہے گی۔

اسٹیٹس دیکھنے کے علاوہ گروپ اراکین کو یہ بھی اختیار حاصل ہوگا کہ وہ اسے ری شیئر کر سکیں۔

فی الحال یہ فیچر صرف محدود صارفین کو دستیاب ہے، لیکن امکان ہے کہ آئندہ چند ماہ میں اسے تمام صارفین کے لیے باضابطہ طور پر جاری کر دیا جائے گا۔ تاہم اس بارے میں حتمی وقت کا تعین فی الحال ممکن نہیں۔