مون سون کی تباہ کاریاں: بارشوں سے 11 افراد جاں بحق

ملک بھر میں مون سون بارشوں نے تباہی مچادی، مختلف حادثات کے نتیجے میں 11 افراد جان کی بازی ہار گئے۔

شدید مون سون بارشوں کے باعث ملک کے مختلف علاقوں میں معمولاتِ زندگی شدید متاثر ہو رہے ہیں۔ لاہور میں علی الصبح ہونے والی موسلا دھار بارش نے شہر کا نظام درہم برہم کر دیا، جہاں کئی اہم شاہراہیں زیرِ آب آگئیں اور ٹریفک کی روانی متاثر ہوئی۔

پنجاب کے دیگر شہروں، بشمول اسلام آباد، راولپنڈی، گوجرانوالہ، فیصل آباد اور سیالکوٹ میں بھی وقفے وقفے سے بارش کا سلسلہ جاری ہے۔ نشیبی علاقوں میں پانی جمع ہونے سے رہائشیوں کو شدید مشکلات کا سامنا ہے، جبکہ نکاسیٔ آب کے ناقص انتظامات نے مسائل میں مزید اضافہ کر دیا ہے۔

قصور میں کرنٹ لگنے کے مختلف واقعات میں دو بچے اور ایک خاتون جاں بحق ہو گئے۔ دیگر شہروں میں آسمانی بجلی گرنے اور مختلف حادثات کے نتیجے میں مجموعی طور پر 11 افراد جان سے ہاتھ دھو بیٹھے۔

بلوچستان کے کئی اضلاع میں گرج چمک کے ساتھ بارش جاری ہے، جبکہ آزاد کشمیر اور گلگت بلتستان میں شدید بارشوں کے باعث ندی نالوں میں طغیانی اور سیلابی صورتحال پیدا ہو گئی ہے۔

ادھر کراچی کے مختلف علاقوں میں رات گئے کہیں ہلکی اور کہیں تیز بارش ہوئی۔ گلشن حدید، نیشنل ہائی وے اور مضافاتی علاقوں میں بونداباندی سے موسم خوشگوار ہو گیا، تاہم شہریوں کو پھسلن اور سڑکوں پر پانی جمع ہونے جیسے مسائل کا سامنا کرنا پڑا۔