غزہ پر اسرائیلی حملہ، 10 بچوں سمیت 15 فلسطینی شہید

غزہ کے علاقے دیر البلح میں اسرائیلی فضائی حملے کے نتیجے میں کم از کم 15 فلسطینی شہید ہو گئے، جن میں 10 معصوم بچے اور 3 خواتین شامل ہیں۔ حملے کا ہدف ایک میڈیکل پوائنٹ تھا جو خواتین اور بچوں کو طبی و غذائی امداد فراہم کر رہا تھا۔

غزہ کے سرکاری میڈیا آفس کے مطابق یہ حملہ اسرائیلی قابض افواج کی جانب سے فلسطینی شہریوں، خصوصاً خواتین اور بچوں کے خلاف منظم قتل عام کی پالیسی کا حصہ ہے۔ اعلامیے میں کہا گیا کہ اسرائیلی بمباری کے ذریعے رہائشی علاقوں، بازاروں اور بنیادی سہولیات کو بھی نشانہ بنایا جا رہا ہے۔

شہدائے الاقصیٰ اسپتال سے موصولہ مناظر میں بچوں کی لاشیں فرش پر پڑی دیکھی جا سکتی ہیں، جب کہ طبی عملہ شدید زخمیوں کو فوری طبی امداد فراہم کر رہا ہے۔

دوسری جانب اسرائیلی فوج نے مؤقف اختیار کیا ہے کہ فضائی کارروائی کا ہدف حماس کے ایک جنگجو کو بنانا تھا۔ فوج نے شہری ہلاکتوں پر افسوس کا اظہار کرتے ہوئے کہا ہے کہ واقعے کی تحقیقات کی جا رہی ہیں۔

غزہ کی وزارتِ صحت کے مطابق گزشتہ 24 گھنٹوں کے دوران اسرائیلی حملوں میں 82 فلسطینی شہید اور 247 زخمی ہو چکے ہیں۔