پاکستان اور یورپی یونین کے درمیان 20 ملین یورو کا ترقیاتی معاہدہ

پاکستان اور یورپی یونین کے درمیان "بہتر طرزِ حکمرانی اور کاروباری ماحول" کے پروگرام کے تحت 20 ملین یورو کی گرانٹ پر مبنی معاہدہ طے پا گیا ہے۔

وفاقی وزارتِ اقتصادی امور کے مطابق، اس معاہدے کا مقصد پاکستان میں بہتر طرز حکمرانی، اقتصادی ترقی، اور کاروباری ماحول کو فروغ دینا ہے، جو دونوں فریقین کے درمیان جامع اور پائیدار ترقی کے مشترکہ عزم کی عکاسی کرتا ہے۔

معاہدے پر دستخط یورپی یونین کی سفیر ڈاکٹر رینا کیونکا اور سیکریٹری اقتصادی امور ڈاکٹر کاظم نیاز نے کیے۔ یہ پروگرام یورپی یونین کے طویل مدتی اشارتی فریم ورک 2021-2027 کے تحت مالی معاونت حاصل کرے گا۔

یورپی یونین کی اس معاونت کا خاص ہدف نجی شعبے، بالخصوص چھوٹے اور درمیانے درجے کے کاروبار (SMEs) کو مستحکم کرنا ہے۔ ان میں خواتین کی زیر قیادت کاروبار اور ایسے منصوبے بھی شامل ہیں جو خواتین کو معاشی فوائد فراہم کرتے ہیں۔

اس منصوبے کے تحت نہ صرف ایس ایم ایز سے متعلق قانون سازی کو مؤثر بنایا جائے گا بلکہ برآمدی صنعتوں کو گرین اکانومی کی طرف منتقلی میں بھی سہولت دی جائے گی۔ اس کے علاوہ، سرمایہ کاری کے فروغ اور نجی و سرکاری شعبے کے درمیان مؤثر مکالمے کو بھی فروغ دیا جائے گا۔

وزارت کے مطابق، یہ پروگرام یورپی یونین کی گلوبل گیٹ وے اسٹریٹجی، جی ایس پی پلس وعدوں اور گرین ڈیل اہداف سے ہم آہنگ ہے، اور پاکستان میں پائیدار سرمایہ کاری اور مضبوط سپلائی چین کے قیام میں اہم کردار ادا کرے گا۔