ریسلر انعام بٹ پاکستان ریسلنگ فیڈریشن کے بلامقابلہ سیکرٹری جنرل منتخب

لاہور: پاکستان کے مایہ ناز ریسلر انعام بٹ  پاکستان ریسلنگ فیڈریشن کے بلامقابلہ سیکرٹری جنرل منتخب ہو گئے ہیں۔

اس موقع  پر پرائیڈ آف پرفارمنس ایواراڈ یافتہ فری اسٹائل ریسلر انعام بٹ کا کہنا ہے ریٹائرمنٹ نہیں لی اور عالمی سطح پر مقابلے کھیلتا رہوں گا۔ 

بطور سیکرٹری منتخب ہونے کے بعد ان کا کہنا تھا کہ نوجوانوں کے لیے کھیل کے مواقع پیدا کرنے کی بھرپور کوشش کریں گے۔

انہوں نے مزید کہا کہ وہ اب قومی سطح پر نوجوانوں کی حوصلہ افزائی کریں گے، لیکن عالمی سطح پر پاکستان کی نمائندگی کرنے کے لیے تیار ہیں۔

انعام بٹ کے مطابق انہوں نے سو دن کا پلان بنایا ہے جس کے ذریعے بچوں کو ریسلنگ کھیلنے کا مواقع ملے گے۔

لمبے عرصے سے سیکرٹری کی سیٹ پر براجمان ارشد ستار پاکستان ریسلنگ فیڈریشن کے صدر منتخب ہوئے ہیں، جبکہ چوہدری مبین کا بطور چیئرمین انتخاب ہوا ہے۔ محمد ریاض خزانچی کی ذمہ داری سنبھالیں گے۔ باڈی میں پہلی بار خواتین ممبران کو بھی شامل کیا گیا ہے۔

خیال رہے کہ 36سالہ ریسلر نے اپنے 15 سالہ کریئر میں پاکستان کے لیے کامن ویلتھ اور ساوتھ ایشین گیمز سمیت 8 گولڈ میڈل جیتے ہیں۔ قومی پہلوان نے 3 سلور اور ایک برونز میڈل بھی اپنے نام کر رکھا ہے۔