وزیراعظم کا برطانیہ کیلئے پی آئی اے پروازوں کی بحالی پر اظہارِ تشکر

اسلام آباد: پاکستان کی قومی ایئرلائن( پی آئی اے) کو کئی برسوں بعد بالآخر برطانیہ کیلئے فضائی آپریشن کی بحالی کی اجازت کو وزیراعظم شہباز شریف نے ملک کیلئے ایک بڑی سفارتی کامیابی قرار دیتے ہوئے کہا ہے کہ اللہ کے فضل سے پاکستان کی ساکھ بحال ہوئی ہے۔

تفصیلات کے مطابق وزیراعظم نے ”ایکس“ پر جاری اپنے بیان میں کہا کہ پی ٹی آئی کے بعض رہنماؤں کے غیر ذمہ دارانہ اور بے بنیاد بیانات کے باعث پاکستان کو عالمی سطح پر شدید بدنامی کا سامنا کرنا پڑا، جس کے نتیجے میں قومی ایئرلائن کو یورپ اور برطانیہ سمیت اہم فضائی راستوں سے محروم ہونا پڑا۔

وزیراعظم کی جانب سے جاری بیان میںمزید کہا گیا ہے کہ برطانیہ میں 16 لاکھ سے زائد پاکستانی نژاد افراد آباد ہیں جبکہ ہزاروں برطانوی شہری پاکستان میں موجود ہیں۔

وزیر اعظم کا کہنا تھا کہ ایسے میں اس فیصلے سے نہ صرف خاندانوں کے درمیان ملاقاتوں کی راہ ہموار ہوگی بلکہ دونوں ممالک کے درمیان تجارتی تعلقات کو بھی فروغ ملے گا۔ برطانیہ پاکستان کا تیسرا سب سے بڑا تجارتی شراکت دار ہے اور یہ بحالی اس تعلق کو مزید مستحکم کرے گی۔

خیال رہے کہ برطانیہ نے پاکستانی ایئرلائنز پر عائد فضائی پابندی ختم کرنے کا اعلان کیا ہے، جو پاکستان کے اصلاحاتی اقدامات کے بعد ممکن ہوا۔ اس فیصلے کے تحت پاکستانی ایئرلائنز اب برطانیہ کے لیے پروازوں کی بحالی کی درخواست دے سکتی ہیں۔