دنیا بھر کی جیلوں میں 21 ہزار سے زائد پاکستانی قید، سعودی عرب سرِفہرست

اسلام آباد: وزارتِ سمندر پار پاکستانی نے انکشاف کیا ہے کہ دنیا کے 76 ممالک میں مجموعی طور پر 21,406 پاکستانی شہری قید ہیں، جن میں سب سے زیادہ تعداد سعودی عرب اور متحدہ عرب امارات میں قید پاکستانیوں کی ہے۔

یہ انکشاف سینیٹ کی قائمہ کمیٹی برائے سمندر پار پاکستانی کے اجلاس میں کیا گیا، جس کی صدارت سینیٹر ذیشان خانزادہ نے کی۔ وزارت کے حکام نے اجلاس کو بریفنگ دیتے ہوئے بتایا کہ:

سعودی عرب میں سب سے زیادہ 10,423 پاکستانی قید ہیں۔

متحدہ عرب امارات میں 5,297 پاکستانی جیلوں میں موجود ہیں ، ترکی میں 1,437 اور بھارت میں 738 پاکستانی مختلف الزامات میں قید ہیں۔

حکام کے مطابق، 14 ممالک میں قائم پاکستانی سفارتخانوں سے قیدیوں کا مکمل ریکارڈ ابھی تک حاصل نہیں ہو سکا۔ مزید یہ بھی بتایا گیا کہ کئی پاکستانی محض جرمانہ ادا نہ کر سکنے کے باعث جیلوں میں قید ہیں۔

 پچھلے اعدادوشمار سے فرق:
یاد رہے کہ 19 مئی 2025 کو وزارتِ خارجہ نے قومی اسمبلی کو بتایا تھا کہ دنیا بھر میں 23,456 پاکستانی قید ہیں، جن میں:

سعودی عرب میں 12,156 ، یو اے ای میں 5,211 ، چین میں تقریباً 400 ، بحرین میں 450 ، افغانستان میں 88 ، قطر میں 338 ، عمان میں 309 ، ملائیشیا میں 255 پاکستانی شامل تھے۔

یہ فرق اس بات کی نشاندہی کرتا ہے کہ یا تو کچھ قیدی رہا ہو چکے ہیں، یا نئے اعدادوشمار میں کچھ ممالک کا ڈیٹا شامل نہیں کیا گیا۔