شہریوں کے لیے اچھی خبر،سی ایم فری وائی فائی سروس کا دائرہ کار مزید بڑھا دیا گیا

لاہور: شہریوں کی سہولت کے پیش نظر پنجاب سیف سٹیز اتھارٹی نے سی ایم فری وائی فائی سروس کا دائرہ کار مزید بڑھا دیا گیا۔

تفصیلات کے مطابق لاہور سمیت پنجاب کے 22 اضلاع میں اب 710 مقامات پر مفت انٹرنیٹ کی سہولت فراہم کر دی گئی ہے۔

پنجاب سیف سٹیز اتھارٹی کے مطابق لاہور شہر میں فری وائی فائی پوائنٹس کی تعداد 230 سے بڑھا کر 430 کر دی گئی ہے جبکہ سروس کو پنجاب کے 11 سے بڑھا کر 22 اضلاع تک فعال کر دیا گیا ہے۔

ان میں لاہور، قصور، ننکانہ صاحب، شیخوپورہ، سیالکوٹ، گجرات، جہلم، اٹک، حسن ابدال، ساہیوال، اوکاڑہ اور مری کے اہم اضلاع شامل ہیں۔
اتھارٹی کی جانب سے مزید بتایا گیا کہ اب تک 37.22 ملین سے زائد صارفین فری وائی فائی سروس سے مستفید ہو چکے ہیں اور 905 ٹیرا بائٹ ڈیٹا استعمال کیا جا چکا ہے۔

جبکہ جدید تقاضوں کو مدنظر رکھتے ہوئے فری وائی فائی سروس کو نئی ٹیکنالوجی Wi-Fi 6 پر منتقل کر دیا گیا ہے، جس سے صارفین کو مزید تیز اور مستحکم انٹرنیٹ کی سہولت میسر آئے گی۔