لانگ مارچ توڑ پھوڑ کیس: علی امین گنڈاپور اور شفقت محمود کو ذاتی حیثیت میں طلبی کا حکم

اسلام آباد کی ڈسٹرکٹ اینڈ سیشن عدالت میں پاکستان تحریک انصاف (پی ٹی آئی) کے رہنماؤں کے خلاف لانگ مارچ کے دوران توڑ پھوڑ سے متعلق کیس کی سماعت ہوئی۔ عدالت نے وزیراعلیٰ خیبرپختونخوا علی امین گنڈاپور اور سابق وفاقی وزیر شفقت محمود کو آئندہ سماعت پر ذاتی حیثیت میں پیش ہونے کا حکم دیا ہے۔

سماعت کے دوران دونوں رہنماؤں کا چالان عدالت میں جمع کرایا گیا، جبکہ پی ٹی آئی کے کارکنان سردار محمد مصروف خان، زاہد بشیر ڈار اور مرتضیٰ طوری عدالت میں پیش ہوئے۔

عدالت نے کیس میں شامل دیگر غیر حاضر ملزمان کے ناقابلِ ضمانت وارنٹ گرفتاری جاری کر دیے۔ ساتھ ہی علی امین گنڈاپور اور شفقت محمود کو پیشی کے نوٹسز جاری کرتے ہوئے آئندہ سماعت میں ذاتی حاضری یقینی بنانے کی ہدایت کی گئی۔

یاد رہے کہ تھانہ بارہ کہو میں لانگ مارچ کے دوران املاک کو نقصان پہنچانے کے الزام میں پی ٹی آئی قیادت اور کارکنوں کے خلاف دو مقدمات درج کیے گئے تھے، جن پر عدالتی کارروائی جاری ہے۔