ڈاکٹر یاسمین راشد کی جیل میں طبیعت مزید بگڑ گئی

پاکستان تحریک انصاف (پی ٹی آئی) کی سینئر رہنما اور سابق وزیر صحت ڈاکٹر یاسمین راشد کی جیل میں طبیعت ایک بار پھر بگڑ گئی۔ ان کے وکیل رانا مدثر ایڈووکیٹ کے مطابق، ڈاکٹر یاسمین راشد کو معدے کے شدید انفیکشن اور سانس لینے میں دشواری کا سامنا ہے۔

“ہفتے کے روز ڈاکٹر یاسمین راشد کو زبردستی اسپتال سے ڈسچارج کر کے جیل منتقل کر دیا گیا، حالانکہ اُن کے میڈیکل ٹیسٹ ہو چکے تھے اور علاج جاری تھا۔ نہ اہلِ خانہ کو اطلاع دی گئی، نہ وکلا کو۔”

انہوں نے یہ بھی کہا کہ ان کی موکلہ کو علاج کی بنیادی سہولیات تک فراہم نہیں کی جا رہیں، جو آئینی طور پر ہر قیدی کا حق ہے۔

پنجاب اسمبلی میں ڈپٹی اپوزیشن لیڈر معین ریاض قریشی نے اس معاملے کو "انسانی حقوق کی سنگین خلاف ورزی" قرار دیا۔ ان کے الفاظ میں “یہ انتہائی افسوسناک ہے کہ حکومت ایک بزرگ، علیل خاتون کو مناسب علاج سے محروم رکھ کر سیاسی انتقام لے رہی ہے۔ یہ عمل غیر اخلاقی اور غیر انسانی ہے۔”

انہوں نے دعویٰ کیا کہ جب ڈاکٹر یاسمین راشد کو سانس لینے کے لیے بی آئی پی اے پی مشین فراہم کی گئی تو رات کے وقت بجلی بند کر دی گئی تاکہ مشین کام نہ کرے۔

پی ٹی آئی کے امریکا ونگ نے بھی اس پر شدید ردعمل دیتے ہوئے کہا “ریاست ڈاکٹر یاسمین راشد کے ساتھ انتقامی رویہ اپنا رہی ہے، یہ انصاف نہیں، محض سیاسی انتقام ہے۔”

پاکستان کا آئین ہر شہری کو زندگی، وقار، اور طبی سہولیات کا حق دیتا ہے، چاہے وہ زیرِ حراست ہی کیوں نہ ہو۔ سپریم کورٹ اور ہائی کورٹس کے فیصلے بھی واضح کرتے ہیں کہ قیدی کو صحت کی مکمل سہولیات دینا ریاست کی ذمہ داری ہے۔