غزہ میں شہادتوں کی تعداد 59 ہزار سے تجاوز کر گئی، فلسطینی وزارت صحت

فلسطینی وزارت صحت کا کہنا ہے کہ غزہ کی پٹی میں جاری اسرائیلی جارحیت اور نسل کشی پر مبنی جنگ کے نتیجے میں شہید ہونے والے فلسطینیوں کی تعداد 59 ہزار سے تجاوز کر چکی ہے۔

ترکیہ کے سرکاری خبر رساں ادارے انادولو ایجنسی کی رپورٹ کے مطابق، فلسطینی وزارت صحت نے اپنے تازہ ترین بیان میں بتایا کہ اکتوبر 2023 سے جاری اسرائیلی حملوں کے دوران اب تک 59,029 فلسطینی شہید ہو چکے ہیں، جبکہ 1,42,135 شہری زخمی ہوئے ہیں۔

وزارت کے مطابق، صرف گزشتہ 24 گھنٹوں میں 134 شہداء کی لاشیں اسپتالوں میں لائی گئیں جبکہ 1,155 افراد زخمی ہوئے۔ بیان میں کہا گیا ہے کہ متعدد افراد اب بھی ملبے تلے یا کھلے مقامات پر پھنسے ہوئے ہیں، جن تک ریسکیو ٹیمیں پہنچنے سے قاصر ہیں۔

مزید یہ کہ وزارت صحت نے انکشاف کیا ہے کہ گزشتہ روز انسانی امداد حاصل کرنے کی کوشش کے دوران اسرائیلی حملوں میں 99 فلسطینی شہید اور 650 سے زائد زخمی ہوئے، جس کے بعد 27 مئی سے اب تک امدادی سرگرمیوں کے دوران شہید ہونے والوں کی تعداد 1,021 اور زخمیوں کی تعداد 6,511 سے تجاوز کر گئی ہے۔

بیان میں اس امر کی بھی نشاندہی کی گئی کہ اسرائیلی فوج نے رواں سال جنوری میں ہونے والی عارضی جنگ بندی کی خلاف ورزی کرتے ہوئے 18 مارچ سے دوبارہ حملے شروع کر دیے، جس کے بعد سے 8,196 افراد شہید اور 30,094 زخمی ہو چکے ہیں۔

واضح رہے کہ بین الاقوامی فوجداری عدالت (ICC) نے نومبر 2023 میں اسرائیلی وزیر اعظم بنیامین نیتن یاہو اور ان کے سابق وزیر دفاع یوآو گالانٹ کے خلاف غزہ میں جنگی جرائم اور انسانیت کے خلاف جرائم کے الزامات میں وارنٹ گرفتاری جاری کیے تھے۔