مون سون ، چوتھے اسپیل کے دوران کئی شہروں میں نشیبی علاقے زیرِ آب

ملک کے مختلف علاقوں میں مون سون کے چوتھے اسپیل کے دوران شدید بارشوں سے کئی شہروں میں نشیبی علاقے زیرِ آب آ گئے جبکہ بعض مقامات پر لینڈ سلائیڈنگ اور ندی نالوں میں طغیانی کے واقعات بھی رپورٹ ہوئے ہیں۔

محکمہ موسمیات کے مطابق گزشتہ 24 گھنٹوں کے دوران سب سے زیادہ بارش اسلام آباد کے علاقے سید پور میں ریکارڈ کی گئی جہاں 184 ملی میٹر بارش ہوئی۔ اسلام آباد ہی کے دوسرے علاقے گولڑہ میں 99 ملی میٹر، راولپنڈی میں 54 ملی میٹر اور چکلالہ میں 40 ملی میٹر بارش ریکارڈ کی گئی۔

پنجاب کے ضلع نارووال میں 62 ملی میٹر، سیاحتی مقام مری میں 42 ملی میٹر، جبکہ آزاد کشمیر کے علاقوں گڑھی دوپٹہ میں 75 ملی میٹر، مظفرآباد میں 62 ملی میٹر اور کوٹلی میں 57 ملی میٹر بارش ہوئی۔

خیبرپختونخوا کے ضلع بالاکوٹ میں 30 ملی میٹر اور پاراچنار میں 25 ملی میٹر بارش ریکارڈ کی گئی۔ بلوچستان کے علاقے قلات میں بھی موسلادھار بارش ہوئی جہاں 28 ملی میٹر بارش نوٹ کی گئی۔

محکمہ موسمیات نے آئندہ 24 گھنٹوں کے دوران مزید بارشوں کی پیشگوئی کی ہے اور متعلقہ اداروں کو الرٹ رہنے کی ہدایت کی ہے۔ شہریوں کو ہدایت کی گئی ہے کہ وہ احتیاطی تدابیر اختیار کریں اور غیر ضروری سفر سے گریز کریں۔

مری میں گزشتہ رات سے شروع ہونے والی موسلادھاربارش کا سلسلہ وقفے وقفے سےجاری ہے  جس کے نتیجے میں کئی درخت گرگئے اور گاڑیاں پھنس گئیں جب کہ راولپنڈی میں بھی شدید بارش سے پانی گھروں میں داخل ہوگیا۔

مری کے بوستال روڈ  اور ایکسپریس وے کے آوائین کے مقام پر پر لینڈ سلائیڈنگ کے واقعات دیکھنے میں آئے جس دوران 3افراد پتھر لگنے سے معمولی زخمی ہوگئے جب کہ امدادی ٹیموں نے گاڑیوں اور  11 افراد کو بحفاظت نکال لیا دوسری جانب نمب جھنڈا گلی گاؤں میں لینڈ سلائیڈنگ کے نتیجے میں 2 گھر زد میں آگئے تاہم کوئی جانی نقصان نہیں ہوا۔

مری میں وقفے وقفے سے جاری موسلادھار بارشوں اور تیز ہواؤں کے باعث کئی درخت گرگئے جس کے نتیجے میں متعدد گاڑیاں پھنس گئی ہیں، بارشوں کے نتیجے میں بھوربن اور ملحقہ علاقوں میں گزشتہ 12 گھنٹے سے بجلی کی فراہمی معطل ہے۔

ڈپٹی کمشنر نے شہریوں کو مری کے غیرضروری سفر سے گریز کی ہدایت کی اور کہا کہ  ندی نالوں اور ڈیمز میں نہانے سے مکمل سے گریز کریں۔