زمان پارک حملہ کیس: شبلی فراز کے ناقابلِ ضمانت وارنٹ،عدالت پیش کرنے کا حکم

لاہور: لاہور کی مقامی عدالت نے زمان پارک میں پاکستان تحریک انصاف (پی ٹی آئی) کے بانی عمران خان کی رہائش گاہ کے باہر اسلام آباد پولیس پر حملے کے مقدمے میں پی ٹی آئی رہنما سینیٹر شبلی فراز کے ناقابلِ ضمانت وارنٹ گرفتاری جاری کر دیے ہیں۔

عدالت نے ہدایت کی ہے کہ شبلی فراز کو آئندہ سماعت پر گرفتار کر کے عدالت میں پیش کیا جائے۔

عدالت نے مقدمے میں نامزد بانی پی ٹی آئی عمران خان کو بھی 30 جولائی کو طلب کر لیا ہے اور اڈیالہ جیل حکام کے نام سمن جاری کر دیے گئے ہیں۔

یہ مقدمہ تھانہ ریس کورس پولیس لاہور کی جانب سے درج کیا گیا تھا۔

پس منظر:

واضح رہے کہ 5 مارچ 2023 کو اسلام آباد پولیس توشہ خانہ کیس میں مسلسل عدم حاضری پر عدالت کی جانب سے جاری ناقابلِ ضمانت وارنٹ گرفتاری پر عمل درآمد کے لیے لاہور میں عمران خان کی رہائش گاہ زمان پارک پہنچی تھی۔

پولیس کی آمد کے بعد پی ٹی آئی کارکنوں کی بڑی تعداد فواد چوہدری کی اپیل پر زمان پارک پہنچ گئی تھی، جس کے بعد صورتحال کشیدہ ہوگئی تھی۔

اسلام آباد پولیس کا کہنا تھا کہ جو بھی گرفتاری میں رکاوٹ ڈالے گا اس کے خلاف قانونی کارروائی کی جائے گی۔ اسلام آباد پولیس چیف نے واضح کیا تھا کہ وہ خالی ہاتھ واپس نہیں جائیں گے، تاہم اس روز عمران خان کی گرفتاری عمل میں نہ آ سکی تھی۔