عدالت کی مداخلت پر سینیٹ میں ہنگامہ، اٹارنی جنرل کو طلب کرنے کا مطالبہ

اسلام آباد: سینیٹ کمیٹیوں کی کارروائی پر اسلام آباد ہائی کورٹ کی جانب سے نوٹسز کے اجرا نے سینیٹ اجلاس میں شدید ہنگامہ برپا کر دیا۔ ارکانِ سینیٹ نے اس اقدام کو پارلیمنٹ کی خودمختاری میں مداخلت قرار دیتے ہوئے فوری طور پر اٹارنی جنرل کو ایوان میں طلب کرنے کا مطالبہ کر دیا۔

پریزائڈنگ افسر سینیٹر عرفان صدیقی کی زیر صدارت ہونے والے اجلاس میں سینیٹر سلیم مانڈوی والا نے عدالت کی مداخلت پر شدید تحفظات کا اظہار کیا اور کہا کہ یہ اقدام پارلیمانی امور میں مداخلت کے مترادف ہے۔ اس موقع پر پریزائڈنگ افسر شہادت اعوان نے ان سے اتفاق کرتے ہوئے کہا کہ اٹارنی جنرل کو وضاحت کے لیے نوٹس بھجوایا جائے گا۔

اجلاس میں نو منتخب سینیٹر روبینہ ناز نے حلف اٹھایا۔ وقفہ سوالات کے دوران وفاقی وزیر ہاؤسنگ ریاض پیرزادہ نے انکشاف کیا کہ اگرچہ اربوں روپے کے فلیٹس تعمیر ہو چکے ہیں، لیکن ان میں پانی جیسی بنیادی سہولت میسر نہیں، جس کی وجہ منصوبہ بندی کی کمی اور بااثر افراد کی مداخلت ہے۔

سینیٹر سیف اللہ ابڑو نے ایف جی ایچ اے کی کارکردگی پر سوالات اٹھاتے ہوئے کہا کہ اگر بینک اسٹیٹمنٹس سامنے لائی جائیں تو کئی وزرا کے نام ظاہر ہو سکتے ہیں۔

بینظیر انکم سپورٹ پروگرام (BISP) کے آڈٹ سسٹم پر بھی اعتراضات سامنے آئے، جس پر وفاقی وزیر طارق فضل چوہدری نے وضاحت دی کہ فی الوقت پرانا طریقہ کار ہی جاری ہے۔

سینیٹر پلوشہ خان نے اسرائیل کی جانب سے مغربی کنارے پر قبضے کی حالیہ قرارداد کو غیر قانونی قرار دیتے ہوئے اس کی شدید مذمت کی اور کہا کہ پاکستان کی خاموشی ناقابلِ قبول ہے۔ بعدازاں، ایوان نے اسرائیلی جارحیت کے خلاف متفقہ مذمتی قرارداد منظور کی۔

سینیٹر ذیشان خانزادہ نے ٹیرف ریفارم پالیسی پر عمل درآمد نہ ہونے کو برآمدات میں رکاوٹ قرار دیا، جبکہ سینیٹر ہمایوں مہمند نے اسلام آباد کے علاقوں سیدپور اور نجی ہاؤسنگ سوسائٹیوں میں پیش آنے والے حادثات کو ناقص منصوبہ بندی کا نتیجہ قرار دیا۔

اجلاس میں اکادمی ادبیات اور دیگر علمی اداروں کی ممکنہ بندش پر بھی شدید تشویش کا اظہار کیا گیا اور حکومت سے ان اداروں کے تحفظ کی اپیل کی گئی۔

آخر میں اجلاس کو غیر معینہ مدت کے لیے ملتوی کر دیا گیا۔