ٹرمپ نے فرانسیسی صدر کے فلسطینی ریاست کو تسلیم کرنے کے اعلان کو مسترد کر دیا

واشنگٹن ڈی سی:امریکی صدر ڈونلڈٹرمپ نے فرانسیسی صدرایماونل میکرون کے فلسطینی ریاست تسلیم کرنے کے اعلان کو مسترد کر دیا۔
غیر ملکی میڈیا کے مطابق امریکی صدر نے کہا کہ صدر میکرون کے فلسطین کو ریاست تسلیم کرنے کے بیان میں توازن نہیں ہے۔

وائٹ ہاؤس میں میڈیا سے گفتگو کرتے ہوئے ڈونلڈ ٹرمپ کا کہنا تھا کہ فرانسیسی صدر میکرون جو کہتے ہیں اس سے فرق نہیں پڑتا، مگر وہ بہت اچھے انسان ہیں۔

میڈیا رپورٹ کے مطابق صدر ٹرمپ نے حماس کو دھمکی دیتے ہوئے کہا کہ ہم نے غزہ سے بہت سے یرغمالی نکال لیے ہیں اور جو رہ گئے ہیں ان کی رہائی بھی جلد ہوگی۔

خیال رہے اس سے قبل امریکی وزیر خارجہ مارکو روبیو نے بھی سوشل میڈیا پلیٹ فارم ایکس پر فرانس کے فلسطین کو بطور ریاست تسلیم کرنے کے اعلان کے جواب میں اپنی پوسٹ میں لکھا کہ جلد بازی میں کیا گیا فیصلہ حماس کی فتح اور 7 اکتوبر کے متاثرین کے منہ پر تھپڑ ہے، یہ لاپرواہی پر مبنی فیصلہ صرف حماس کے پراپیگنڈے کو تقویت دے گا اور اس سے امن کو دھچکا لگے گا۔

خیال رہے کہ فرانس اس وقت یورپ میں یہودیوں اور مسلمانوں کی سب سے بڑی آبادی رکھنے والا ملک ہے اور پہلی بڑی مغربی طاقت ہوگی جو فلسطین کو تسلیم کرے گی۔

فرانس نے اس اعلان کا وقت جنرل اسمبلی کا آئندہ اجلاس اس لیے منتخب کیا ہے تاکہ دیگر ممالک کے ساتھ مل کر دو ریاستی حل کے لیے نیا سفارتی فریم ورک پیش کرسکے۔