وزیر خارجہ اسحاق ڈار کا مارکو روبیو سے ٹیلیفونک رابطہ،ٹیرف ،تجات اور دو طرفہ تعلقات پر تبادلہ خیال

نیو یارک:نائب وزیراعظم اور وزیر خارجہ سینیٹر اسحاق ڈار کی امریکی وزیر خارجہ مارکو روبیو سے ٹیلی فون پر بات چیت ہوئی، جس میں دونوں رہنماؤں کے مابین دو طرفہ تعلقات،تجارت، علاقائی اور عالمی امور بشمول ٹیرف پر تبادلہ خیال کیا۔

ترجمان دفتر خارجہ کے مطابق نائب وزیراعظم اور وزیر خارجہ سینیٹر اسحاق ڈار نے امریکی وزیر خارجہ مارکو روبیو سے ٹیلی فون پر بات چیت کی، جس میں ٹیرف سمیت دوطرفہ معاملات پر بات ہوئی، اس کے علاوہ باہمی دلچسپی کے علاقائی اور عالمی امور پر بھی بات ہوئی۔

علاوہ ازاں اقوام متحدہ میں مسئلہ فلسطین کے دو ریاستی حل پر بین الاقوامی کانفرنس کا انعقاد کیا گیا، اس دوران نائب وزیرِاعظم اسحاق ڈار نے سائیڈ لائن میں غیر ملکی رہنماؤں سے ملاقاتیں کیں۔

وزیرِ خارجہ اسحاق ڈار نے عوامی جمہوریہ بنگلہ دیش کے مشیر برائے امور خارجہ توحید حسین سے ملاقات کی، اکتوبر 2024 سے اب تک یہ دونوں رہنماؤں کی چوتھی ملاقات تھی۔

دوران ملاقات دونوں رہنماؤں نے دوطرفہ تعلقات کا جائزہ لیا جبکہ سیاسی، معاشی اور ثقافتی تعاون کو فروغ دینے کے عزم کا اعادہ کیا۔

ملاقات میں دونوں فریقین نے روابط بڑھانے اور عوامی سطح پر تبادلوں کو فروغ دینے کی اہمیت پر زور دیا اور مستقبل قریب میں اعلیٰ سطحی دوروں پر اتفاق کیا۔

فریقین نے غزہ میں جاری انسانی بحران اور اسرائیلی جارحیت پر گہری تشویش کا اظہار کیا، فلسطینی عوام اور ان کے جائز نصب العین سے اپنی غیر متزلزل یکجہتی کا اعادہ کیا اور کانفرنس سے بامعنی اور تعمیری نتائج کی امید ظاہر کی۔