رحیم یارخان، شیخانی پولیس چوکی پر ڈاکوؤں کے حملے میں 5 اہلکار شہید

رحیم یارخان میں پولیس چوکی پر ڈاکوؤں کے حملے میں 5 اہلکار شہید جبکہ 2 زخمی ہوگئے۔

پولیس کے مطابق رحیم یارخان کی شیخانی پولیس چوکی پر ڈاکوؤں کی جانب سے حملہ  کیا گیا جس میں 5 پولیس اہلکار شہید جبکہ 2 زخمی  ہوئے۔

ترجمان پولیس کا کہنا ہے کہ فائرنگ کے تبادلے میں ایک ڈاکو بھی مارا گیا۔ شہید اہلکاروں میں محمد عرفان ، محمد سلیم اور محمد خلیل، کانسٹیبل نخیل،غضنفر عباس شامل ہیں۔

ترجمان پولیس کا کہنا ہے کہ شہید ہونے والے 2 اہلکاروں کا تعلق رحیم یارخان جبکہ 3  کا تعلق بہاول نگر سے ہے ۔

ڈی پی او عرفان علی سموں کی قیادت میں پولیس کی بھاری نفری علاقے میں پہنچ گئی اور کچہ کو جانے والے تمام راستوں کی ناکہ بندی کر دی گئی ہے۔

ترجمان پولیس کے مطابق، حملہ آور درجنوں ڈاکو جدید اسلحہ سے لیس تھے جنہوں نے پولیس چوکی کو نشانہ بنایا۔

ڈی پی او عرفان علی سموں نے کہا کہ ڈاکو ریاست اور قانون سے بالاتر نہیں ہو سکتے، انہیں ہر صورت کیفر کردار تک پہنچایا جائے گا، بزدلانہ حملے کا خمیازہ ڈاکوؤں کو بھگتنا ہو گا۔

ترجمان پولیس کے مطابق، علاقے میں سرچ آپریشن جاری ہے، پولیس جدید ہتھیاروں اور بکتر بند گاڑیوں کا استعمال کر رہی ہے تاکہ ڈاکوؤں کو گرفتار یا انجام تک پہنچایا جا سکے۔