5 اگست کو یومِ استحصالِ کشمیر بھرپور طریقے سے منایا جائے گا

حکومتِ پاکستان نے 5 اگست کو یومِ استحصالِ کشمیر قومی سطح پر بھرپور طریقے سے منانے کا اعلان کر دیا ہے۔ کابینہ ڈویژن نے اس سلسلے میں وزیراعظم کی منظوری سے باضابطہ نوٹیفکیشن جاری کر دیا۔

یومِ استحصال کے موقع پر ملک بھر میں کل (پیر) صبح 10 بجے ایک منٹ کی خاموشی اختیار کی جائے گی تاکہ کشمیری عوام کے ساتھ اظہارِ یکجہتی کیا جا سکے۔

نوٹیفکیشن میں کہا گیا ہے کہ وزیراعظم نے یہ فیصلہ کشمیری عوام کی جدوجہدِ آزادی اور ان کے حقِ خودارادیت کی حمایت میں لیا ہے، اور یہ خاموشی کشمیریوں کے خلاف بھارتی مظالم پر احتجاج کا ایک علامتی اظہار ہوگی۔

یاد رہے کہ 5 اگست 2019ء کو بھارت نے ریاست جموں و کشمیر کی خصوصی آئینی حیثیت ختم کرتے ہوئے آئین کے آرٹیکل 370 اور 35A کو منسوخ کر دیا تھا۔ یہ اقدام نہ صرف اقوامِ متحدہ کی قراردادوں اور عالمی قوانین کی خلاف ورزی تھا بلکہ خود بھارتی آئین کی صریح پامالی بھی تھا۔

آرٹیکل 370 کے تحت ریاست جموں و کشمیر کو مخصوص خودمختاری حاصل تھی، جس کے تحت بھارتی شہریوں کو وہاں زمین خریدنے، مستقل سکونت اختیار کرنے یا صنعتی منصوبے قائم کرنے کا حق حاصل نہیں تھا۔ اس قانون کی منسوخی کے بعد بھارت نے مقبوضہ کشمیر میں آبادی کا تناسب بدلنے اور مسلم اکثریت کو اقلیت میں تبدیل کرنے کی پالیسی اختیار کی۔

یومِ استحصال کشمیر ہر سال 5 اگست کو کشمیریوں پر ہونے والے بھارتی مظالم اور آئینی غصب کے خلاف بطور احتجاج منایا جاتا ہے۔