برطانوی ایئرپورٹ پر طیارہ لینڈنگ کے دوران طوفانی ہواؤں کی زد میں آ گیا

برطانیہ میں سمندری طوفان "فلورس" نے نظام زندگی درہم برہم کر دیا، جب کہ ایئرپورٹس پر بھی غیر معمولی صورتحال دیکھنے میں آئی۔

لیڈز بریڈفورڈ ایئرپورٹ پر ایک مسافر طیارہ لینڈنگ کے دوران شدید طوفانی ہواؤں کی لپیٹ میں آ گیا۔ سوشل میڈیا پر وائرل ویڈیو میں دیکھا جا سکتا ہے کہ طیارہ زمین پر اترنے سے قبل مسلسل فضا میں ڈولتا رہا، تاہم پائلٹ نے انتہائی مہارت اور حوصلے کے ساتھ جہاز کو بحفاظت رن وے پر اتار لیا۔

طوفان فلورس کے باعث ملک بھر میں درجنوں پروازیں اور ٹرینیں منسوخ کر دی گئیں، جبکہ متعدد تقریبات بھی ملتوی کر دی گئی ہیں۔ حکام نے خبردار کیا ہے کہ تیز ہواؤں اور شدید بارشوں کے باعث نظام زندگی میں بڑے پیمانے پر خلل کا خدشہ ہے۔

رپورٹس کے مطابق یارکشائر، شمالی انگلینڈ، آئرلینڈ اور اسکاٹ لینڈ میں طوفانی ہواؤں اور موسلادھار بارش کے پیش نظر ریڈ الرٹ جاری کر دیا گیا ہے، اور شہریوں کو غیر ضروری سفر سے گریز کی ہدایت کی گئی ہے۔