پشاور میں پی ٹی آئی کارکنوں کا علی امین گنڈاپور کے خطاب کے بغیر جانے پر احتجاج

خیبرپختونخوا کے وزیر اعلیٰ علی امین گنڈاپور پشاور میں پاکستان تحریک انصاف کی جانب سے عمران خان کی رہائی کے لیے نکالی گئی ریلی سے خطاب کیے بغیر ہی روانہ ہو گئے، جس پر کارکنوں نے شدید احتجاج کیا۔

ریلی کا آغاز حیات آباد ٹول پلازہ سے ہوا، جس کی قیادت وزیر اعلیٰ نے کی۔ ریلی کا اختتام قلعہ بالا حصار پر متوقع تھا، جہاں علی امین گنڈاپور کو کارکنوں سے خطاب کرنا تھا۔ تاہم وہ بغیر تقریر کیے روانہ ہو گئے۔

خطاب نہ کرنے پر پی ٹی آئی کارکن مشتعل ہو گئے اور خیبر روڈ کو ٹریفک کے لیے بند کر دیا۔ کارکنوں نے وزیر اعلیٰ کے خلاف نعرے بازی کی اور ڈی چوک جانے کا مطالبہ کیا۔

ایک خاتون کارکن نے غصے کا اظہار کرتے ہوئے کہا "ہم ان کے خطاب کا انتظار کر رہے تھے، اگر خیبرپختونخوا سنبھالنا نہیں آتا تو علی امین گنڈاپور کو استعفیٰ دے دینا چاہیے۔"

دیگر کارکنوں کا کہنا تھا کہ وہ عمران خان کی محبت میں ریلی میں شریک ہوئے، لیکن وزیر اعلیٰ نے خطاب نہ کرکے کارکنوں کو مایوس کیا۔
کئی افراد نے مطالبہ کیا کہ پارٹی میں صفائی کی جائے اور صرف ایماندار افراد کو آگے لایا جائے۔