پاکستانی ہاکی ٹیم کا بھارت میں ہونے والے ایشیا کپ میں شرکت سے انکار

پاکستان ہاکی فیڈریشن نے قومی ٹیم کو بھارت بھیجنے سے انکار کر دیا، ایشین ہاکی فیڈریشن نے ایشیا ہاکی کپ 2025 کے لیے پاکستان کی جگہ بنگلہ دیش کو ٹورنامنٹ میں شامل کرنے کا پلان بنا لیا ہے۔

سیکریٹری پاکستان ہاکی فیڈریشن رانا مجاہد نے اس حوالے سے کہا ہے کہ پاکستان کو پہلے بھی بھارت میں کھیلنے پر تحفظات تھے اور اب بھی ہیں، اپنے کھلاڑیوں کی جان کا تحفظ سب سے اہم ہے، بھارتی حکومت نے سیکیورٹی دینے کی یقین دہانی نہیں کروائی۔

انہوں نے مزید کہا کہ ایشین ہاکی فیڈریشن نے بنگلہ دیش کو شامل کرنے پر ہمیں آگاہ نہیں کیا، پاکستان ہاکی فیڈریشن اپنی حکومت کے فیصلوں کو ماننے کی پابند ہے، ایشیا کپ کے بعد بھی پاکستان کے پاس ورلڈ کپ میں کوالیفائی کرنے کا موقع موجود ہے۔

خیال رہے کہ بھارتی انتہاء پسند تنظیموں نے پاکستان ہاکی ٹیم کو سنگین نتائج کی دھمکیاں بھی دی تھیں، جس پر پاکستان نے بھارت اور ایشین ہاکی فیڈریشن کو اپنے تحفطات سے آگاہ کر دیا تھا، ساتھ ہی حکومتِ پاکستان نے دھمکیوں اور سیکیورٹی کو مدِ نظر رکھتے ہوئے قومی ٹیم کو بھارت میں کھیلنے کی اجازت دینے سے انکار کر دیا تھا۔

واضح رہے کہ ایشیاء کپ 2025 میں بھارت، چین، جاپان، ملائیشیا، جنوبی کوریا، عمان، چائنیز تائپے کی ٹیمیںشامل ہوں گی، ٹورنامنٹ 27 اگست سے 7 ستمبر تک بھارت کے شہر راجگیر میں شیڈول ہے۔

دوسری جانب اس فیصلے کے بعد پاکستان جونیئر ہاکی ٹیم کی نومبر ، دسمبر میں بھارت میں ہونے والے جو نیئر ہاکی ورلڈ کپ میں بھی شرکت غیر یقینی ہے۔