وفاقی کابینہ کے بعد علی امین گنڈا پور کا بھی ایک مہینے کی تنخوا ہ سیلاب متاثرین کیلئے عطیہ کا فیصلہ

پشاور: وفاقی کابینہ کے بعد وزیراعلیٰ خیبرپختونخوا علی امین گنڈاپورنے بھی اپنی ایک مہینے کی تنخوا ہ سیلاب متاثرین کیلئے عطیہ کرنے کا فیصلہ کیا  ہے۔

ترجمان وزیراعلیٰ ہاؤس  مطابق صوبائی کابینہ اراکین کی 15 دن کی تنخواہ اور ممبران خیبرپختونخوا اسمبلی کی 7دن کی تنخواہیں سیلاب متاثرین کی امداد کیلئے وقف کرنے کا اعلان کیا گیا ہے۔

ترجمان نے مزید کہاکہ اسکیل 17 سے اوپر ملازمین کی 2 دن کی تنخواہ،اسکیل ایک سے 16 تک ملازمین کی ایک دن کی تنخواہ سیلاب متاثرین کو دینے کا فیصلہ کیا گیا ہے۔

ترجما ن کا کہنا تھا کہ وزیر اعلیٰ نے ان عطیات کے شفاف استعمال کے لئے بھی طریقہ کار وضع کرنے کی ہدایت کردی ہے۔

دوسری جانب وزیراعلیٰ علی امین گنڈاپور نے کہا کہ تنخواہ عطیہ کرنے کیلئے پی ڈی ایم اے میں خصوصی اکاؤنٹ کھولا جائے گا۔

انہوںنے مزید کہا کہ سیلاب متاثرین ہماری خصوصی توجہ اور تعاون کے مستحق ہیں،مشکل کی اس گھڑی میں سب کو دل کھول کر متاثرین کی مدد کرنی چاہیے۔

خیال رہے کہ اس سے قبل وفاقی کابینہ نے بھی اپنی ایک ماہ کی تنخواہ سیلاب متاثرین کے لیے عطیہ کرنے کا اعلان کیا ہے۔