لاہور میں الیکٹرک ٹرام سروس کب شروع ہو گی ؟صوبائی حکومت نے بتادیا

لاہور: پنجاب حکومت صوبائی دارالحکومت لاہور میں الیکٹرک ٹرام سروس شروع کرنے کا اعلان کر دیا۔

اس حوالے سے صوبائی وزیر ٹرانسپورٹ بلال اکبر نے ممکنہ تاریخ بتا دی۔

صوبائی وزیر ٹرانسپورٹ پنجاب بلال اکبر کے مطابق ٹرام کا ٹیسٹ کامیاب ہو گیا جس کے بعد ٹھوکر سے ہربنس پورہ تک ٹرام سروس فروری 2026 سے شروع ہوگی۔

میڈیا سے گفتگو کرتے ہوئے صوبائی وزیر بلال اکبر نے بتایا کہ ٹرام میں 270 نشستوں کی گنجائش ہوگی، منصوبے پر 30 لاکھ ڈالر لاگت آئے گی ۔

بلال اکبر کا کہنا تھا کہ منصوبے کی تکمیل کے لیے پنجاب نیسپاک اور پی ایم اے افسران نے چین کا دورہ کیا۔

انہوں نے مزید کہا کہ اس پنجاب حکومت کی جانب سے لاہور کے علاوہ فیصل آباد اور گوجرانوالہ میں بھی میٹرو ٹرین چلانے کا فیصلہ کیا ہے، فیصل آباد میٹرو ٹرین روزانہ 3 لاکھ مسافروں کو سہولت دے گی جبکہ گوجرانوالہ میٹرو ٹرین یومیہ 1 لاکھ 40 ہزار مسافراس سہولت سے مستفید ہو سکیں گے۔

انہوں نے مزید بتایا کہ فیصل آباد میٹرو منصوبے کی لاگت 110 ملین ڈالر مقرر کی گئی ہے اور گوجرانوالہ میٹرو منصوبے پر 50 ملین ڈالر لاگت آئے گی۔

بلال اکبر کا کہنا تھاکہ لاہور میں موٹرسائیکل اور گاڑیوں سے ماحولیاتی آلودگی میں اضافہ ہورہا ہے، ٹرام اور میٹرو منصوبے ماحولیاتی آلودگی پر قابو پانے کی کوشش ہے۔