کوشش ہے اس بار سینیٹ انتخابات میں پیسہ نہ چلے: وزیر اعظم

وزیراعظم عمران خان کی زیرصدارت تحریک انصاف کے پارلیمانی بورڈ کا اجلاس ہوا، جس میں سینیٹ کیلئےحتمی امیدواروں کے ناموں پرغور کیا گیا اور سینیٹر بننے کے خواہشمند افراد کی لسٹ پر مشاورت مکمل کی گئی۔وزیراعظم کی جانب سے پارلیمانی بورڈ ارکان کی سفارشات کا تفصیلی جائزہ لیا گیا۔

اجلاس میں روایتی طریقہ کار سے ہٹ کرسینیٹ کے لیے میرٹ پر ٹکٹ دینے پراتفاق کیا گیا، وزیراعظم نے کہا سینیٹ انتخابات میں پیسہ چلنے کی روایت ختم کررہے ہیں، جو ایوان میں پارٹی کے لیے بہتر ہوگا اسے سینیٹر بنائیں گے۔عمران خان کا کہنا تھا کہ پیسے لگا کر ایوان میں آنےوالےعوام کے فائدے کا کبھی نہیں سوچ سکتے، شفاف انتخابات اورایوان بالامیں اکثریت حاصل کرنے کیلئے پر امید ہیں۔

دوسری جانب تحریک انصاف نے سینیٹ کیلئے نام فائنل کرلیے۔عبدالحفیظ شیخ ، شبلی فراز، ثانیہ نشتر اور فیصل ووڈا سمیت دیگر اراکین کے نام سامنے آگئے ۔ سماجی رابطوں کی ویب سائٹ ٹوئٹر سے جاری اپنے پیغام میں وفاقی وزیر سائنس و ٹیکنالوجی فواد چودھری نے کہا کہ پاکستان تحریک انصاف (پی ٹی آئی) نے سینیٹ کی زیادہ تر نشستوں پر اپنے امیدواروں کے نام فائنل کر لیے ہیں۔اسلام آباد سے عبدالحفیظ شیخ اور فوزیہ ارشد پی ٹی آئی کی امیدوار فائنل کی گئی۔انہوں نے مزید بتایا کہ سندھ سے فیصل واوَڈا سینیٹ کا الیکشن لڑیں گے جب کہ ٹیکنو کریٹ نشست پر سیف اللہ ابڑو پی ٹی آئی کے امیدوار ہوں گے۔

ان کا کہنا تھا کہ بلوچستان سے سینیٹ کےلیے عبدالقادر کا نام فائنل کیا گیا ہے۔خیبر پختونخواسے شبلی فراز، محسن عزیز، دوست محمد، ثانیہ نشتر اور فرزانہ کا نام حتمی فہرست میں شامل ہیں۔ان کا کہنا تھا کہ پنجاب سےسیف اللہ نیازی ،ڈاکٹر زرقہ اور بیرسٹر علی ظفر امیدوار ہوں گے۔وفاقی وزیر نے بتایا کہ باقی نشستوں پر اعلان بعد میں ہو گا۔