کوہاٹ: پولیس کے کامیاب جوابی آپریشن میں 3 دہشت گرد جاں بحق، ایک اہلکار شہید

کوہاٹ: خیبرپختونخوا کے ضلع کوہاٹ کی تحصیل لاچی کےمیں نامعلوم افراد نے فائرنگ کر کے پولیس موبائل وین کو نشانہ بنایا جس کے نتیجے میں ایک پولیس اہلکار شہید اور دو زخمی ہوگئے،بعد ازاں پولیس کی جوابی کارروائی میں 3 دہشت گرد مارے گئے۔

  پولیس وین پر فائرنگ کے واقعے کی اطلاع ملتے ہی ریجنل پولیس آفیسر (آر پی او)عباس مجید مروت اور ڈسٹرکٹ پولیس آفیسر(ڈی پی او) ڈاکٹر زاہد اللّٰہ بھاری نفری کے ہمراہ فوری طور پر موقع پر پہنچے، اور آپریشن کی کمان سنبھال لی۔ 

پولیس نے کامیاب کارروائی کرتے ہوئے 3 دہشت گردوں کو مار گرایا جبکہ متعدد زخمی ہو کر فرار ہونے میں کامیاب ہو گئے، جن کی تلاش میں سرچ آپریشن تاحال جاری ہے، مارے گئے دہشت گردوں کی شناخت کا عمل جاری ہے۔

اس موقع پر آر پی اوعباس مجید مروت نے گفتگو کرتے ہوئے کہا کہ ہمارے بہادر جوانوں نے دہشت گردوں کا مقابلہ کیا اور انہیں کیفر کردار تک پہنچایا، ہم اپنے شہیدوں کی قربانیوں کو رائیگاں نہیں جانے دیں گے اور دہشت گردی کے خلاف ہماری جنگ جاری رہے گی۔

خیال رہے کہ اس سے قبل کوہاٹ میں درملک پولیس چوکی کے قریب دہشت گردوں نے پولیس موبائل پر اندھا دھند فائرنگ کی گئی، فائرنگ کے نتیجے میں پی ایس آئی اشفاق موقع پر ہی شہید ہوگئے جبکہ کانسٹیبل یاسر اور شفقت محمود شدید زخمی ہوئے۔

ایمرجنسی اطلاع ملتے ہی ریسکیو 1122 کی میڈیکل ٹیموں نے فوری کارروائی کرتے ہوئے زخمی اہلکاروں کو ابتدائی طبی امداد فراہم کی اور انہیں پہلے ٹائپ ڈی ہسپتال لاچی منتقل کیا گیا، بعدازاں حالت تشویشناک ہونے پر ڈسٹرکٹ ہیڈ کوارٹرز ہسپتال کوہاٹ منتقل کر دیا گیا،جہاں زخمی اہلکاروں کو بہترین طبی سہولیات فراہم کی گئیں۔

اس موقع پرآپریشن کی نگرانی سینئر ڈسٹرکٹ ایمر جنسی آفیسر کوہاٹ محمد عارف خٹک اور ایمر جنسی آفیسر حضرت نواب خان نے خود کی۔