ڈکی بھائی نے جسمانی ریمانڈ کے خلاف سیشن کورٹ سے رجوع کرلیا، اہلیہ کی ضمانت میں توسیع 

لاہور: معروف یوٹیوبر سعد الرحمٰن المعروف ڈکی بھائی نے اپنے جسمانی ریمانڈ میں بار بار توسیع کے خلاف سیشن کورٹ سے رجوع کرلیا۔

تفصیلات کے مطابق لاہور کے جوڈیشل میجسٹریٹ نے 28 اگست کو ڈکی بھائی کے جسمانی ریمانڈ میں تیسری بار چار روز کی توسیع کی تھی، جس کے خلاف ان کے وکیل چوہدری عثمان علی نے ہفتہ 30 اگست کو سیشن کورٹ میں درخواست دائر کی۔

عدالت نے درخواست سماعت کے لیے منظور کرتے ہوئے نیشنل سائبر کرائم انویسٹی گیشن ایجنسی (این سی سی آئی اے) کو نوٹس جاری کرتے ہوئے ان سے  پیر تک جواب طلب کرلیا۔

درخواست میں مؤقف اختیار کیا گیا کہ جوڈیشل میجسٹریٹ نے جسمانی ریمانڈ میں توسیع سے پہلے حقائق کا جائزہ نہیں لیا، اس لیے ریمانڈ کو کالعدم قرار دیا جائے۔

 خیال رہے کہ ڈکی بھائی 17 اگست کو لاہور ایئرپورٹ سے گرفتار ہوئے تھے اور اس وقت سے این سی سی آئی اے کی تحویل میں ہیں۔ ایجنسی ان کے خلاف غیر قانونی آن لائن جوا ایپلی کیشنز کے فروغ کے الزامات کی تحقیقات کر رہی ہے۔

دوسری جانب اسی کیس میں ڈکی بھائی کی اہلیہ ، عروب جتوئی کی قبل از گرفتاری ضمانت میں 15 ستمبر تک کی کوسیع کر دی گئی ہے۔ 

سیشن کورٹ نے نیشنل سائبر کرائم انویسٹی گیشن ایجنسی کو انہیں گرفتار کرنے سے روک دیا ہے اور اگلی سماعت پر تفصیلی رپورٹ طلب کر لی ہے۔ 

اہلیہ عروب جتوئی نے اپنی اپیل میں کہا تھا کہ وہ تفتیش میں تعاون کرنے کے لیے تیار ہیں۔ ان کی پہلی ضمانت کی درخواست 21 اگست کو منظور ہوئی تھی جس کےبعد وہ ایجنسی کے سامنے پیش بھی ہوئیں۔ 

مقدمے کی آئندہ سماعت پیر کو ہو گی، جس میں عدالت این سی سی آئی اے کے موقف کا جائزہ لے گی۔