طلباءکے لیے اچھی خبر،ایچ ای سی نے کامن ویلتھ اسکالر شپس کا اعلان کر دیا

اسلام آباد: بیرون ملک سے اعلی تعلیم حاصل کرنے والے پاکستانی طلباء کے لیے اچھی خبر سامنے آئی ہے، ہائر ایجوکیشن کمیشن ( ایچ ای سی) کی جانب سے کامن ویلتھ اسکالر شپس کا اعلان کر دیا گیا ہے۔

کامن ویلتھ اسکالر شپ کیا ہے؟

خیال رہے کہ کامن ویلتھ یا دولت مشترکہ کے زیر انتظام ہر سال دولت مشترکہ کے ممالک کے لیئے اسکالرشپ کا اعلان کیا جاتا ہے۔ یہ دولت مشترکہ کے متام ممالک بشمول پاکستان کے لیئے ہوتا ہے۔ اس کے تحت کامن ویلتھ کے رکن ممالک جس میں پاکستان بھی شامل ہے مکمل تعلیمی اسکالرشپ حاصل کرسکتے ہیں۔

کامن ویلتھ اسکالرشپ کے تحت ماسٹر اور پی ایچ ڈی کے لیئے مکمل اسکالر شپ دیئے جاتے ہیں۔ جس میں کامیاب طالب علم کے تقریبا تعلیم کے تمام ہی اخراجات شامل ہوتے ہیں۔ اس میں تقریبا ہر شعبے میں داخلہ دیا جاتا ہے ماسوائے ایم بی اے کے۔

اس پروگرام کو بین الاقوامی ترقی کے مقاصد کے تحت شروع کیا گیا ہے اورکامیاب طالب علموں کو برطانیہ کی صف اول کی یونیورسٹیوں میں تعلیم حاصل کرنے کا موقع فراہم کیا جاتا ہے۔

اپلائی کرنے کا طریقہ کار :
اس اسکالر شپ میں اپلائی کرنے کے خواہش مند ایچ ای سی کے آنلائن پورٹل پر جا کر درخواست جمع کروا سکتے ہیں جس کے بعد تمام درخواست گزاروں کو ایچ ای سی کی جانب سے کنڈکٹ کیا جانے والا ٹیسٹ HAT  پاس کرنا ہو گا۔

متعلقہ تاریخیں:

اسکالر شپ میں اپلائی کرنے کی آخری تاریخ 20ستمبر ہے جبکہ ایچ ای سی کی جانب سے لیا جانے والا HAT ٹیسٹ 12 اکتوبر کو منعقد کیا جائے گا۔