سیلاب زدگان کے بجلی کے بل معاف کیے جائیں ، بلاول بھٹو کا مطالبہ

پاکستان پیپلز پارٹی کے چیئرمین بلاول بھٹو زرداری نے مطالبہ کیا ہے کہ سیلاب سے متاثرہ علاقوں کے کسانوں کے بجلی کے بل فوری طور پر معاف کیے جائیں تاکہ وہ دوبارہ زراعت کی بحالی کی طرف قدم بڑھا سکیں۔

مظفرگڑھ کے علاقے ٹھٹھہ سیال میں سیلاب متاثرین سے ملاقات کے دوران گفتگو کرتے ہوئے بلاول بھٹو کا کہنا تھا کہ صرف بل معافی کافی نہیں، بلکہ حکومت کو فوری طور پر بیج اور کھاد کی فراہمی بھی یقینی بنانی چاہیے تاکہ کسان دوبارہ کھیتوں میں کام شروع کر سکیں۔

انہوں نے کہا کہ اس وقت سیاست یا پوائنٹ اسکورنگ کا موقع نہیں، بلکہ تمام جماعتوں کو متاثرہ افراد کی مدد کے لیے متحد ہونا چاہیے۔ "جب کوئی آفت آتی ہے تو یہ نہیں دیکھا جاتا کہ متاثرہ فرد کا تعلق کس پارٹی یا علاقے سے ہے؛ ہماری اولین ترجیح انسانیت ہونی چاہیے،" بلاول بھٹو نے زور دیا۔

پیپلز پارٹی چیئرمین نے تجویز پیش کی کہ حکومت کو قومی سطح پر فنڈز جمع کرنے کی مہم شروع کرنی چاہیے تاکہ زیادہ سے زیادہ وسائل متاثرین کی بحالی کے لیے استعمال کیے جا سکیں۔

انہوں نے ایک بار پھر وفاقی حکومت سے زرعی ایمرجنسی نافذ کرنے کا مطالبہ کیا اور کہا کہ وفاق اور صوبے مل کر مربوط حکمت عملی کے تحت کام کریں تاکہ امداد براہ راست مستحقین تک پہنچے۔

اس موقع پر انہوں نے بینظیر انکم سپورٹ پروگرام (BISP) کو سب سے مؤثر طریقہ قرار دیا جس کے ذریعے شفاف انداز میں متاثرہ خاندانوں تک امداد پہنچائی جا سکتی ہے۔