معروف بھارتی گلوکار زوبین گرگ اسکوبا ڈائیونگ کے دوران انتقال کر گئے

بھارت کے معروف گلوکار اور موسیقار زوبین گرگ اسکوبا ڈائیونگ کے دوران انتقال کر گئے۔

بھارتی میڈیا رپورٹس کے مطابق، زوبین گرگ جو 2006 کی بالی وڈ فلم ’گینگسٹر‘ کے مشہور گانے ’یا علی‘ سے شہرت کی بلندیوں پر پہنچے، سنگاپور میں اسکوبا ڈائیونگ کرتے ہوئے جان کی بازی ہار گئے۔ ان کی عمر 52 سال تھی۔

زوبین گرگ آج سنگاپور میں منعقد ہونے والے ’نارتھ ایسٹ فیسٹیول‘ میں پرفارم کرنے والے تھے۔

رپورٹس میں بتایا گیا ہے کہ حادثے کے بعد سنگاپور پولیس نے انہیں پانی سے نکال کر فوری طور پر اسپتال منتقل کیا، جہاں انہیں آئی سی یو میں رکھا گیا، تاہم وہ جانبر نہ ہو سکے۔

نارتھ ایسٹ فیسٹیول کے منتظمین نے ایک بیان میں زوبین کے انتقال پر افسوس کا اظہار کرتے ہوئے کہا "بہت دکھ کے ساتھ ہم زوبین گرگ کے انتقال کی خبر شیئر کر رہے ہیں۔ اسکوبا ڈائیونگ کے دوران انہیں سانس لینے میں دشواری ہوئی، فوری طور پر سی پی آر دیا گیا اور اسپتال لے جایا گیا، مگر تمام تر کوششوں کے باوجود وہ بچ نہ سکے۔"

زوبین گرگ کی اچانک وفات نے ان کے مداحوں اور شوبز انڈسٹری کو شدید صدمے میں مبتلا کر دیا ہے۔

زوبین نے فلم ’گینگسٹر‘ کے ہٹ گانے ’یا علی‘ کے علاوہ فلم ’کرش 3‘ کا مشہور نغمہ "دل تو ہی بتا" اور ’پیار کے سائیڈ ایفیکٹس‘ کا گانا "جانے کیا چاہے من" سمیت متعدد کامیاب گیت گائے۔

وہ نہ صرف ہندی بلکہ آسام، بنگالی، نیپالی اور دیگر علاقائی زبانوں میں بھی گلوکاری کرتے رہے، اور اپنی ہمہ جہتی صلاحیتوں کے باعث ایک منفرد مقام رکھتے تھے۔