کامن ویلتھ بیچ ہینڈ بال چیمپئن شپ، پاکستان نے سیمی فائنل کیلئے کوالیفائی کر لیا

مالدیپ میں جاری کامن ویلتھ بیچ ہینڈ بال چیمپئن شپ میں پاکستان نے اپنی شاندار کارکردگی کا تسلسل برقرار رکھتے ہوئے سیمی فائنل کے لیے کوالیفائی کر لیا ہے۔

ہفتے کے روز پاکستان نے دو اہم میچز میں میدان مارا۔ پہلے مقابلے میں پاکستان نے جنوبی افریقہ کو 0-2 سے شکست دی، جہاں کاشف علی نے عمدہ کھیل کا مظاہرہ کرتے ہوئے 18 پوائنٹس اسکور کیے اور میچ کے بہترین کھلاڑی قرار پائے۔ پاکستان نے پہلا سیٹ 15-24 اور دوسرا سیٹ 5-28 سے اپنے نام کیا۔

شام کو کھیلے گئے دوسرے میچ میں پاکستان نے بنگلہ دیش کے خلاف بھی یکطرفہ مقابلے کے بعد 0-2 سے کامیابی حاصل کی، جہاں محمد شاہد بشیر نے 18 پوائنٹس اسکور کیے، احمد حسن بیگ نے 12 اور حضرت حسین نے 4 پوائنٹس بنائے۔

میچ کے سیٹ اسکورز 9-30 اور 13-32 رہے، اور شاہد بشیر کو پلیئر آف دی میچ قرار دیا گیا۔ پاکستان نے اب تک لیگ مرحلے میں بھارت، سری لنکا اور میزبان مالدیپ سمیت پانچوں حریفوں کو شکست دے کر لیگ راؤنڈ میں ناقابل شکست رہتے ہوئے سیمی فائنل میں سب سے مضبوط ٹیم کی حیثیت سے جگہ بنالی ہے۔