اقوام متحدہ میں ٹرمپ کو دلچسپ صورتحال کا سامنا، اسکیلیٹر بند، ٹیلی پرامپٹر خراب

نیویارک: امریکی صدر ڈونلڈ ٹرمپ کو اقوام متحدہ کی جنرل اسمبلی کے اجلاس کے دوران ایک دلچسپ صورتِ حال کا سامنا کرنا پڑا، جب ان کے ساتھ پیش آئے چند غیر متوقع تکنیکی مسائل خبروں کی زینت بن گئے۔

منگل کی صبح صدر ٹرمپ اپنی اہلیہ میلانیا ٹرمپ کے ہمراہ مین ہیٹن میں واقع اقوام متحدہ کے ہیڈکوارٹر پہنچے۔ جیسے ہی وہ عمارت کی بالائی منزل کی جانب جانے کے لیے اپنے عملے کے ساتھ اسکیلیٹر پر سوار ہوئے، اچانک اسکیلیٹر رک گیا۔

اس صورتحال میں صدر ٹرمپ اور خاتون اول کو سیڑھیوں کے ذریعے اوپر جانا پڑا۔

اس کے بعد جب ٹرمپ جنرل اسمبلی کے ہال میں اسٹیج پر خطاب کے لیے پہنچے تو وہاں بھی ٹیلی پرامپٹر نے کام کرنا بند کر دیا۔ صدر ٹرمپ نے صورتحال کو ہنسی میں اڑاتے ہوئے کہا "میں صرف اتنا کہہ سکتا ہوں کہ جو شخص یہ ٹیلی پرامپٹر چلا رہا ہے، اس کی خیر نہیں!"

خطاب کے دوران ٹرمپ نے اقوام متحدہ پر تنقید کرتے ہوئے کہا کہ "یہاں آ کر مجھے ایک ٹوٹا ہوا اسکیلیٹر ملا۔ اگر خاتون اول کی طبیعت ٹھیک نہ ہوتی، تو وہ گر بھی سکتی تھیں۔"

صدر ٹرمپ نے ایک بار پھر دعویٰ کیا کہ انہوں نے عالمی سطح پر متعدد تنازعات ختم کرانے میں کردار ادا کیا ہے، لیکن ان کے بقول اقوام متحدہ نے ان کوششوں میں کوئی مدد نہیں کی۔