بجلی کے شعبے میں گردشی قرضہ تمام وسائل کو نگل رہا تھا، اس کے مسائل سے نمٹنا بڑی کامیابی ہے،وزیر اعظم

نیویارک: وزیراعظم شہباز شریف نے کہا ہےکہ بجلی کے شعبے میں گردشی قرضہ تمام وسائل کو نگل رہا تھا، اس کے مسائل سے نمٹنا بہت بڑی کامیابی ہے۔

تفصیلات کے مطابق نیویارک میں شعبہ توانائی کے گردشی قرضے کے خاتمے کے منصوبے کی افتتاحی تقریب سے ورچوئل خطاب کرتے ہوئے وزیراعظم شہباز شریف نے کہا ہے کہ گردشی قرضہ تمام وسائل کو نگل رہا تھا اور یہ مسلسل بڑھتا جارہا تھا، بجلی کے شعبے میں لائن لاسز بھی ایک بڑا چیلنج ہے، اگلے مرحلے میں لائن لاسز کے مسئلے پر توجہ دی جائے گی۔

تقریب سےخطاب میں شہباز شریف نے کہا کہ آئی پی پیز کمپنیوں کے ساتھ مذاکرات اور مسئلے کا حل چیلنج تھا۔ تاہم وزیر توانائی کی سربراہی میں ٹاسک فورس نے بہترین کام کیا، ان کامزید کہنا تھا کہ گردشی قرضے کے مسئلے کے حل کا کریڈٹ حکومت کو جاتا ہے۔ اور فیلڈ مارشل کی کاوشیں بھی لائق تحسین ہیں۔

وزیر اعظم شہباز شریف نے مزید کہا ہے کہ آئی ایم ایف کی ایم ڈی سے اہم ملاقات ہوئی، انہوں نے پاکستان کی معاشی بہتری کی تعریف کی۔
وزیر اعظم نے کہا کہ محنت سے کام کریں گے تو کامیابی قدم چومے گی۔ اگلا مرحلہ کمپنیوں کی نجکاری اور نقصان کا ازالہ ہے۔ اور پاکستان بہت جلد تمام مشکلات سے نکل آئے گا۔ جبکہ شعبہ توانائی کے گردشی قرضوں کے نقصان کا ازالہ بھی چیلنج ہے۔

اس موقع پر تقریب سے خطاب کرتے ہوئے وفاقی وزیر توانائی اویس لغاری نے کہا ہے کہ گردشی قرضے کی وجہ سے معیشت پر بہت بوجھ ہے اور اس وجہ سے توانائی کا شعبہ متاثر ہو رہا تھا، گردشی قرضے پر قابو پانے کے لیے اتفاق رائے سے لائحہ عمل وضع کیا گیا، گردشی قرضے کے خاتمے کی سکیم شعبہ توانائی میں اصلاحات کا حصہ ہے، سکیم کے تحت آئندہ 6 سال میں گردشی قرضے سے نجات حاصل ہوجائے گی۔

 وزیر خزانہ کا مزید کہنا تھا کہ پاور سیکٹر کے اسٹرکچرل مسائل حل ہورہے ہیں، گردشی قرضے کے خاتمے کے لیے ایک سال سے کوششیں جاری تھیں، گردشی قرضے کے خاتمے کی سکیم اہم سنگ میل ہے، گردشی قرضے کے خاتمے کی توانائی کے شعبے پر دور رس اثرات مرتب ہوں گے۔