اتر پردیش: میلاد النبی ﷺ کے جلوس پر پولیس تشدد، 20 مسلمانوں پر مقدمے

نئی دہلی: بھارت میں خاتم النبیین حضرت محمد مصطفیٰ ﷺ سے عقیدت کا اظہار کرنا قابلِ سزا عمل بن گیا۔ ریاست اُتر پردیش میں "آئی لَو محمد ﷺ" کے بینرز اور نعروں پر پولیس نے مسلمانوں کے خلاف کارروائی شروع کر دی ہے۔

بھارتی میڈیا رپورٹس کے مطابق، شہر کانپور میں 12 ربیع الاول کے موقع پر میلاد النبی ﷺ کے جلوس کے دوران مسلمان شہریوں نے "I Love Muhammad ﷺ" کا بینر آویزاں کیا، جس پر ہندو انتہا پسندوں نے شدید ردعمل دیا اور جلوس میں بدنظمی پھیلانے کی کوشش کی۔

رپورٹس کے مطابق، نہ صرف انتہا پسند ہندو عناصر نے بینر پھاڑا اور توڑ پھوڑ کی، بلکہ پولیس نے بھی کئی دن بعد کارروائی کرتے ہوئے 20 مسلمانوں کے خلاف مقدمات درج کر لیے۔

پولیس کے اس اقدام کے بعد بھارت کے مختلف شہروں میں غم و غصے کی لہر دوڑ گئی اور کئی مقامات پر احتجاجی مظاہرے دیکھنے میں آئے۔

آج رائے بریلی میں "I Love Muhammad ﷺ" کے عنوان سے ایک ریلی نکالی گئی جو اعلیٰ حضرت درگاہ اور اتحاد ملت کونسل کے سربراہ مولانا توقیر رضا خان کی قیادت میں ان کے گھر کے باہر شروع ہوئی۔ ریلی پر پولیس نے دھاوا بول دیا اور لاٹھی چارج کرتے ہوئے کئی افراد کو گرفتار کر لیا۔

اسی طرح سہارنپور میں بھی جمعہ کی نماز کے بعد ایک پرامن ریلی نکالی گئی جس پر پولیس نے طاقت کا استعمال کیا اور متعدد افراد کو حراست میں لے لیا۔

بھارتی ریاست مدھیہ پردیش کے دارالحکومت بھوپال، مہاراشٹرا کے شہر ممبئی، اور دیگر کئی علاقوں میں بھی اسی نوعیت کی ریلیاں نکالی گئیں جن میں ہزاروں مسلمان شریک ہوئے۔