شہباز شریف سے ملاقات: ٹرمپ کے کوٹ پر پن نے سوشل میڈیا پر ہلچل مچا دی

وزیراعظم شہباز شریف سے امریکی صدر ڈونلڈ ٹرمپ کی حالیہ ملاقات کے دوران ٹرمپ کے کوٹ پر لگی ایک جنگی جہاز کی پن سوشل میڈیا پر بحث کا باعث بن گئی۔

جمعرات کے روز واشنگٹن میں ہونے والی اس اہم ملاقات میں وزیراعظم شہباز شریف، امریکی صدر ڈونلڈ ٹرمپ، فیلڈ مارشل سید عاصم منیر، امریکی نائب صدر جے ڈی وینس اور وزیر خارجہ مارکو روبیو شریک تھے۔ ملاقات وائٹ ہاؤس کے اوول آفس میں ہوئی جو تقریباً ایک گھنٹہ 20 منٹ تک جاری رہی۔

اس ملاقات کے دوران صدر ٹرمپ کے کوٹ پر نمایاں طور پر لگی ایک ایف-22 ریپٹر طیارے کی سونے کی پن نے آن لائن صارفین کی توجہ حاصل کر لی، اور دیکھتے ہی دیکھتے سوشل میڈیا پر چہ مگوئیاں شروع ہو گئیں۔

کئی صارفین نے اسے بھارت کے خلاف پاکستان کی حالیہ عسکری کامیابی کا "خاموش اعتراف" قرار دیا، جب کہ کچھ نے کہا کہ ٹرمپ نے دانستہ طور پر یہ پن پہن کر بھارتی وزیراعظم نریندر مودی کو پیغام دیا ہے۔ ایک بھارتی صارف نے تو مودی کو براہ راست ٹیگ کرتے ہوئے لکھا: "یہ بہت بڑا اشارہ ہے۔"

تاہم ان قیاس آرائیوں کو اس وقت دم توڑنا پڑا جب وائٹ ہاؤس نے باضابطہ وضاحت جاری کرتے ہوئے بتایا کہ صدر ٹرمپ نے یہ پن دراصل ترک صدر رجب طیب اردوان سے ملاقات کے موقع پر لگائی تھی، جو شہباز شریف سے ملاقات سے قبل وائٹ ہاؤس آئے تھے۔

یاد رہے کہ ایف-22 ریپٹر ایک امریکی ساختہ جدید لڑاکا طیارہ ہے جس کی پن صدر ٹرمپ اکثر بین الاقوامی دفاعی ملاقاتوں کے موقع پر پہنتے ہیں۔