نیتن یاہو کا خطاب شروع ہوتے ہی عرب و مسلم وفود اقوام متحدہ اجلاس سے واک آؤٹ کر گئے

نیویارک: اقوام متحدہ کی جنرل اسمبلی کے اجلاس کے دوران اسرائیلی وزیر اعظم نیتن یاہو کی تقریر پر شدید ردعمل دیکھنے میں آیا، جیسے ہی وہ خطاب کے لیے اسٹیج پر پہنچے، متعدد ممالک کے نمائندے احتجاجاً اجلاس ہال سے واک آؤٹ کر گئے۔

جنرل اسمبلی کی آج کی کارروائی کا آغاز ہوتے ہی سب سے پہلے نیتن یاہو کو تقریر کے لیے مدعو کیا گیا۔ ان کے اسٹیج پر آتے ہی متعدد مسلم اور عرب ممالک کے وفود نے احتجاجاً اپنی نشستیں چھوڑ دیں اور اجلاس سے باہر چلے گئے۔

اس واک آؤٹ کو نیتن یاہو اور اسرائیل کے خلاف بین الاقوامی سطح پر بڑھتی ہوئی ناراضی کا اظہار قرار دیا جا رہا ہے، خاص طور پر غزہ میں جاری انسانی حقوق کی خلاف ورزیوں اور اسرائیلی پالیسیوں پر شدید عالمی تنقید کے تناظر میں۔

یاد رہے کہ اس سے قبل مختلف بین الاقوامی ذرائع ابلاغ نے رپورٹ کیا تھا کہ نیتن یاہو کے خطاب کے دوران عرب اور مسلم ممالک نے ان کی تقریر کا بائیکاٹ کرنے کا فیصلہ کیا ہے۔ رپورٹس میں کہا گیا تھا کہ جیسے ہی نیتن یاہو تقریر کے لیے اسٹیج پر آئیں گے، مذکورہ ممالک کے مندوبین اجلاس ہال سے اٹھ کر چلے جائیں گے — اور آج وہی مناظر دیکھنے میں آئے۔