سیلاب سے متاثرہ علاقوں میں لوگوں کی بحالی تک چین سے نہیں بیٹھیں گے، وزیر اعظم

نیویارک:وزیراعظم محمد شہباز شریف نے سیلاب متاثرین کے لیے ریلیف اور بحالی کی کارروائیاں تیز کرنے کی ہدایت کرتے ہوئے کہا ہے کہ سیلاب سےمتاثرہ علاقوں میں لوگوں کی بحالی تک چین سے نہیں بیٹھیں گے۔

تفصیلات کے مطابق وزیر اعظم شہباز شریف کی زیرصدارت نیویارک میں سیلابی صورتحال سے متعلق اجلاس منعقد ہوا، جس میں انہوں نے سیلاب متاثرین کیلئے ریلیف اور بحالی کی کارروائیاں تیز کرنے کی ہدایت دیتے ہوئے کہا کہ پاکستان کوموسمیاتی تبدیلی کے اثرات کا سامنا ہے۔

وزیر اعظم نے وفاقی وزیر احسن اقبال کو امداد و بحالی کے آپریشنز کی اور چیئرمین این ڈی ایم اے کو صوبوں اور پی ڈی ایم ایز کو تعاون فراہم کرنے کی ہدایت کی۔

اجلاس کے دوران ویڈیو لنک کے ذریعے خطاب کرتے ہوئے وزیر اعظم نے متاثرہ علاقوں میں نقصانات کے تخمینے کو مکمل کرنے کی ہدایت دیتے ہوئے کہا کہ فصلوں اور بنیادی ڈھانچے کو پہنچنے والے نقصانات کا تخمینہ مکمل کیا جائے۔

دوران اجلاس شہباز شریف سیلابی ریلے سے متاثر ہونے والی موٹروے ایم 5 کے متاثرہ حصے کی بحالی کیلئے این ایچ اے کو اقدامات تیز کرنے کی ہدایت دیتے ہوئے کہا کہ موٹروے جلال پور پیر والا کے مقام پر پڑنے والے شگاف کی فوری مرمت کی جائے۔

اس دوران شہباز شریف نے پانی سے پھیلنے والی بیماریوں سے بچاؤ کیلئے اقدامات لینے کے احکامات جاری کرتے ہوئے کہا کہ سیلاب زدہ علاقوں میں فصلوں کی کاشت کیلئے بھی خصوصی اقدامات کئے جائیں، انہوں نے ہدایت دی کہ آئندہ ایک ہفتے میں نقصانات کے جائزے سے متعلق رپورٹ پیش کی جائے تاکہ بحالی کے عمل کو مزید مؤثر بنایا جا سکے۔

دوران اجلاس چیئرمین این ڈی ایم نے وزیرِاعظم کو سیلاب سے متاثرہ علاقوں کی صورتحال اور بحالی کے لائحہ عمل پر بریفنگ دی، بتایا گیا کہ تقریباً ساڑھے تین لاکھ متاثرہ لوگ امدادی کیمپس و خیمہ بستیوں سے واپس اپنے گھروں کو جا چکے ہیں، سندھ میں اس وقت کچھ کیمپس میں لوگ مقیم ہیں، سیلابی پانی تیزی سے اتر رہا ہے جس کے بعد جلد ان لوگوں کی بھی اپنے گھروں میں واپسی ہوجائے گی۔

اجلاس کو بتایا گیا کہ حکومت پنجاب متاثرین کی بحالی کیلئے مثالی اقدامات کر رہی ہے، اجلاس کو فصلوں کے نقصانات اور کسانوں کی بحالی کے حوالے سے بھی تجاویز پیش کی گئیں۔