پشاور: تحریک انصاف کے جلسے میں بدنظمی، کارکنوں کا اسٹیج پر بوتلیں پھینکنے اور نعرے بازی کا مظاہرہ

پشاور میں تحریک انصاف کے جلسے کے دوران بدنظمی دیکھنے میں آئی، جب وزیراعلیٰ خیبرپختونخوا علی امین گنڈاپور کی تقریر کے دوران کارکنوں نے اسٹیج کی جانب بوتلیں پھینکیں اور نعرے بازی کی۔

جلسے سے خطاب کرتے ہوئے وزیراعلیٰ نے کہا کہ تحریک انصاف کی "حقیقی آزادی" کی جدوجہد جاری رہے گی، اور عدلیہ سے مطالبہ کیا کہ وہ آئین کے مطابق انصاف فراہم کرے۔ انہوں نے بانی پی ٹی آئی، ان کی اہلیہ اور دیگر گرفتار رہنماؤں و کارکنوں کے ساتھ انصاف کا مطالبہ دہراتے ہوئے کہا کہ تمام اداروں کو آئینی دائرے میں کام کرنا ہوگا، ورنہ عوام آواز بلند کرتے رہیں گے۔

علی امین گنڈاپور نے آرمی چیف کا حوالہ دیتے ہوئے کہا کہ "فیلڈ مارشل صاحب، آپ 25 کروڑ عوام کے سپہ سالار ہیں" اور یہ کہ تحریک انصاف اور عوام افواجِ پاکستان کے ساتھ کھڑے ہیں، جیسا کہ بھارت کے ساتھ کشیدگی کے دوران بھی عوام نے افواج کا ساتھ دیا۔

تاہم، ان کے خطاب کے دوران متعدد کارکنوں نے نہ صرف بوتلیں اسٹیج کی طرف پھینکیں بلکہ ان کے خلاف نعرے بازی بھی کی، جس سے جلسے کا ماحول کشیدہ ہو گیا۔

مزید یہ کہ جلسے میں بدنظمی اس وقت بڑھی جب درجنوں مرد کارکن خواتین کے مخصوص انکلوژر میں داخل ہوگئے اور نشستوں پر قابض ہو گئے، جس پر پولیس اہلکاروں نے انہیں دھکے دے کر باہر نکالا۔