کامیڈین لکی ڈیئر سپرد خاک، شوبز انڈسٹری سوگوار

لاہور: تھیٹر، ٹی وی اور فلم کے معروف مزاحیہ اداکار لکی ڈیئر کو لاہور کے مقامی قبرستان میں سپرد خاک کر دیا گیا۔

خاندانی ذرائع کے مطابق 60 سالہ لکی ڈیئر گزشتہ آٹھ ماہ سے پھیپھڑوں کی بیماری اور ذیابیطس جیسے پیچیدہ امراض میں مبتلا تھے، اور کافی عرصے سے لاہور کے میو اسپتال میں زیرِ علاج تھے۔ ان کے اہل خانہ کے مطابق آخری ایام میں ان کی حالت نہایت تشویشناک ہو گئی تھی، وہ کوما میں چلے گئے تھے اور ان کے گردے، جگر اور معدہ بھی کام کرنا چھوڑ چکے تھے۔

مرحوم کی نمازِ جنازہ عصر کے بعد باغبانپورہ میں ادا کی گئی، جس میں شوبز انڈسٹری سے وابستہ فنکاروں، عزیز و اقارب اور مداحوں کی بڑی تعداد نے شرکت کی۔ نمازِ جنازہ کے بعد انہیں مقامی قبرستان میں سپرد خاک کر دیا گیا۔ اس موقع پر اہل خانہ، فنکار برادری اور مداح آبدیدہ نظر آئے۔

یاد رہے کہ لکی ڈیئر گزشتہ چار دہائیوں سے اسٹیج، فلم اور ٹی وی کے میدان میں اپنی مزاحیہ اداکاری سے لوگوں کو محظوظ کرتے رہے۔ انہوں نے سینکڑوں اسٹیج ڈراموں، فلموں اور ٹی وی پروگرامز میں یادگار کردار ادا کیے۔

شوبز حلقوں نے لکی ڈیئر کی فنی خدمات کو زبردست خراجِ عقیدت پیش کرتے ہوئے کہا ہے کہ ان کی کمی ہمیشہ محسوس کی جائے گی اور ان کا خلا کبھی پُر نہیں ہو سکے گا۔