اگلا بجٹ اب ایف بی آر نہیں، وزارتِ خزانہ کا ٹیکس پالیسی آفس بنائے گا: وزیر خزانہ

اسلام آباد: وزیر خزانہ سینیٹر محمد اورنگزیب نے اعلان کیا ہے کہ آئندہ مالی سال کے بجٹ کی تیاری ایف بی آر کے بجائے وزارت خزانہ کا ٹیکس پالیسی آفس کرے گا۔ ان کا کہنا تھا کہ ٹیکس پالیسی کو ایف بی آر سے الگ کر دیا گیا ہے تاکہ اصلاحات کے عمل کو مؤثر بنایا جا سکے۔

یہ بات انہوں نے سینیٹ کی قائمہ کمیٹی برائے خزانہ کے اجلاس کے دوران کہی، جس کی صدارت سلیم مانڈوی والا نے کی۔ اجلاس میں اٹارنی جنرل انور منصور اعوان اور ایف بی آر حکام بھی شریک ہوئے۔

اجلاس کے دوران ایف بی آر کی جانب سے ایک صدارتی آرڈر کے خلاف سندھ ہائیکورٹ میں دائر کردہ اپیل کا معاملہ زیر بحث آیا۔ کمیٹی کے چیئرمین نے کہا کہ ایف بی آر نے صدارتی حکم نامے پر عمل درآمد نہیں کیا اور اس کے خلاف عدالت سے رجوع کیا، حالانکہ قانونی طور پر صدر کے احکامات پر عمل کرنا ادارے کی ذمہ داری ہے۔

متاثرہ شہری کے وکیل نے بھی موقف اختیار کیا کہ ایف بی آر نے تین مرتبہ قانون کی خلاف ورزی کی، اور واضح ہدایات کے باوجود صدر کے فیصلے کو تسلیم نہیں کیا۔ اٹارنی جنرل کا مؤقف تھا کہ اگر معاملہ اشیاء کی درجہ بندی (classification) سے متعلق ہو تو اس پر ایف ٹی او اپیل کر سکتا ہے، تاہم صدارتی احکامات پر عملدرآمد میں کوئی گنجائش نہیں۔

وزیر خزانہ نے کمیٹی کو ملکی معاشی صورتحال پر بریفنگ دیتے ہوئے بتایا کہ پاکستان میں اب میکرو اکنامک استحکام آ چکا ہے۔ ان کا کہنا تھا کہ حکومت رواں سال نومبر کے آخر میں ابتدائی طور پر 25 کروڑ ڈالر کا پانڈا بانڈ جاری کرے گی، اور مجموعی طور پر ایک ارب ڈالر تک کے بانڈز جاری کرنے کا منصوبہ ہے۔

انہوں نے مزید بتایا کہ حکومت نے 50 کروڑ ڈالر کے یورو بانڈ کی ادائیگی کر دی ہے، جبکہ اپریل 2026 میں 1.3 ارب ڈالر کی مزید ادائیگی بھی وقت پر کی جائے گی۔ ان کا کہنا تھا کہ یہ اقدامات معیشت کی سمت کو درست رکھنے کے لیے اٹھائے جا رہے ہیں۔

وزیر خزانہ نے اس بات پر زور دیا کہ ایف بی آر کی تنظیمِ نو کا عمل جاری ہے، جس کی خود وزیراعظم نگرانی کر رہے ہیں۔ ان کے مطابق وزیراعظم اس منصوبے کی ماہانہ اور ہفتہ وار بنیادوں پر رپورٹس بھی لے رہے ہیں، جبکہ ٹیکس پالیسی آفس کو جلد مکمل فعال کر دیا جائے گا۔