چینی جنگی طیارے جے۔35 نے اہم عسکری سنگ میل عبور کر لیا

بیجنگ: چین نے اپنے تیسرے اور جدید ترین ائیرکرافٹ کیریئر "فوجیان" سے اسٹیلتھ فائٹر طیارہ J-35 کی کامیاب اڑان بھر کر ایک اہم عسکری سنگ میل عبور کرلیا ہے۔

چینی سرکاری میڈیا کے مطابق فوجیان نے اپنی جدید Electromagnetic Catapults کے ذریعے تین اقسام کے طیاروں کو کامیابی سے لانچ کیا، جن میں J-15T، ففتھ جنریشن J-35 اسٹیلتھ فائٹر اور KJ-600 ارلی وارننگ اینڈ کنٹرول طیارہ شامل ہیں۔

چینی میڈیا رپورٹس کے مطابق یہ پہلا موقع ہے کہ J-35 اسٹیلتھ فائٹر نے کسی ائیرکرافٹ کیریئر سے اڑان بھری۔

دفاعی ماہرین کے مطابق یہ تجربات چین کی بحری فضائی قوت میں نمایاں اضافہ ہیں اور اس بات کا ثبوت ہیں کہ فوجیان کی لانچ اور ریکوری صلاحیت عالمی سطح پر جدید ترین معیار تک پہنچ چکی ہے۔

میڈیا رپورٹس کے مطابق چین کی جانب سے یہ تجربات بیجنگ میں ہونے والی ستمبر میں پریڈ سے قبل کئے گئے تھے۔

خیال رہے کہ فوجیان چین کا پہلا مکمل طور پر ملکی ڈیزائن شدہ ائیرکرافٹ کیریئر ہے، جو دنیا کا سب سے بڑا روایتی ایندھن سے چلنے والا جنگی جہاز سمجھا جاتا ہے۔

یہ تین جدید ترین الیکٹرو میگنیٹک کیٹاپلٹس سے لیس ہے، یہ نہ صرف بھاری طیاروں کو لانچ کرنے کی صلاحیت رکھتا ہے بلکہ زیادہ پروازوں کو بھی ممکن بناتا ہے۔ اس طرح چین نے ایک اور اہم عسکری سنگ میل عبور کر لیا ہے۔