امیر بالاج قتل کیس میں بڑی پیش رفت، نامزد مرکزی اشتہاری ملزم طیفی بٹ دبئی سے گرفتار

لاہور: ٹیپو ٹرکاں والے بیٹے امیر بالاج ٹیپو کےقتل کیس میں اہم پیشرفت ہوئی ہے ،مقدمے میں نامزد مرکزی اشتہاری ملزم طیفی بٹ کو دبئی سے گرفتار کرلیا گیا ہے، یہ گرفتاری انٹرپول کی مدد سے عمل میں آئی۔

کاؤنٹر کرائم ڈیپارٹمنٹ (سی سی ڈی) کے مطابق امیر بالاج قتل کیس میں نامزد ملزم طیفی بٹ کو انٹرپول کے تعاون سے دبئی میں گرفتار کیا گیا، جسے جلد پاکستان منتقل کرنے کے اقدامات شروع کر دیے گئے ہیں۔

ایڈیشنل آئی جی سی سی ڈی سہیل ظفر چٹھہ نے سی سی پی او لاہور کو ایک مراسلہ لکھ کر امیر بالاج قتل کیس کی تفتیش سی سی ڈی کے سپرد کرنے کی اجازت طلب کر لی ہے۔ اس وقت اس کیس کی تحقیقات لاہور پولیس کی مشترکہ تحقیقاتی ٹیم (جے آئی ٹی) کر رہی ہے۔

پولیس ذرائع نے بتایا کہ لاہور پولیس کی اسپیشل ٹیم خواجہ تعریف گلشن عرف طیفی بٹ کو لینے کے لیے دبئی روانہ ہوگئی ہے، اسپیشل پولیس ٹیم طیفی بٹ کو جلد از جلد کاغذی کارروائی کے بعد لاہور لائے گی۔

پولیس ذرائع نے کہا کہ خواجہ تعریف عرف طیفی بٹ کو لاہور لانے بعد جے آئی ٹی کے حوالے کیا جائے گا، جے آئی ٹی طیفی بٹ سے امیر بالاج ٹیپو کے قتل کے مقدمے میں تفتیش کرے گی۔ 

پولیس ذرائع کا کہنا ہے کہ خواجہ تعریف عرف طیفی بٹ 18 ماہ قبل بالاج ٹیپو کے قتل کے بعد روپوش ہوگیا تھا، امیر بالاج ٹیپو کے قتل کے مقدمہ میں گوگی بٹ اور طیفی بٹ کو نامزد کیا گیا تھا،امیر بالاج ٹیپو کے قتل کا مقدمہ تھانہ چونگ میں درج ہے،جبکہ اگست 2024 میں ٹیپو ٹرکاں والے کے بیٹے امیر بالاج ٹیپو کے قتل کیس کا مرکزی ملزم احسن شاہ مبینہ مقابلے میں مارا گیا تھا۔

خیال رہے کہ امیر بالاج ٹیپو کو 18 فروری 2024 کو شادی کی تقریب میں فائرنگ کر کے قتل کر دیا گیا تھا۔